Qaraqshylar, lańkester Almatyǵa syrttan keldi – Memleket basshysy

NUR-SULTAN. QazAqparat – QR Prezıdenti Qasym-Jomart Toqaev qańtar oqıǵasyna qatysty tóńkeris pe, joq álde bılikke qarsy beıbit sherý me degen saýalǵan qatysty túsinik berdi, dep habarlaıdy QazAqparat tilshisi.

«Bul oqıǵany el ishinde ártúrli atap júrgenin bilemin. Qalaı bolǵanda da biz qaraly, qasiretti kúnderdi bastan ótkerdik. Ony moıyndaýymyz kerek. Táýelsizdiktiń 30 jyly ishinde kóptegen synaqqa tap boldyq, onyń bárin el bolyp eńserdik. Biraq, dál osyndaı qaraqshylardyń qatigez áreketin kórgen joqpyz. Eline, jerine adal qyzmet etetin, naǵyz otanshyl azamattar mundaı opasyzdyqqa barmaıdy. Bul – anyq nárse», - dedi Qasym-Jomart Toqaev Qazaqstan ulttyq telearnasyna bergen suhbatynda.

Sondaı-aq, Prezıdent qańtar oqıǵasyna tóńkeris dep óz baǵasyn berdi.

«Ashyǵyn aıtý kerek, jaǵdaıdy ózderiniń jeke múddesine paıdalanǵysy kelgen adamdar tóńkeris jasaýǵa talpyndy. Frantsýz tilinde osyndaı áreketti coup d’etat dep aıtady. Bul – tóńkeris degen sóz. Eldigimizge, memlekettik tutastyǵymyzǵa, halqymyzdyń qaýipsizdigine qarsy jasalǵan áreket boldy. Árıne, halyqqa áli de kóp nárse túsiniksiz. Qarapaıym azamattar ózderiniń súıikti qalasyn óz qolymen qıratpaıtyny belgili. Qaraqshylar, lańkester Almatyǵa syrttan keldi. Maqsat - kisi óltirý, qorqytý, dúkenderdi tonaý, áıelderdi zorlaý, aqyr sońynda bılikti qulatý», - deıdi ol.