Qaraqshylar agrofırmaǵa shabýyl jasap, 170 mln teńgeni qoldy etti – SQO
PETROPAVL. QazAqparat – Soltústik Qazaqstan oblysy Aqjar aýdany Talshyq aýylynda agrofırma keńsesine qaraqshylyq shabýyl jasalyp, urylar 170 mln teńgeden astam somany qoldy etti, dep habarlaıdy QazAqparat tilshisi.
SQO Polıtsııa departamentiniń málimetinshe, «Talshyq Astyq LTD» JShS-ǵa qaraqshylyq shabýyl 19 qarasha kúni keshki saǵat 19.15-te bolǵan. Sholaq ańshy myltyǵyna uqsas zatpen qarýlanǵan belgisiz tórt qylmysker ǵımaratqa basa-kóktep kirip, JShS basshysyna ses kórsetken. Olar 170 mıllıonnan astam teńgeni jáne 2 uıaly telefondy alyp ketken.
«Atalǵan fakti Sotqa deıingi tergep-tekserýlerdiń biryńǵaı tizilimine engizildi. Bul qylmys SQO PD bastyǵy Marat Tólebaevtyń jáne oblystyq prokýratýra basshysynyń baqylaýyna alyndy», - deıdi baspasóz qyzmetkerleri.
SQO-da qylmyskerlerdi ustaý operatsııasy jarııalandy. Jedel-tergeý is-sharasyna barlyq patrýlder men jasaqtar jumyldyrylyp, oblystardyń Polıtsııa departamentterine baǵyttama jiberildi.
