Qaraqshy notarıýs keńsesine kelip, áıeldiń aqshasy men altynyn alyp ketken
PETROPAVL. QazAqparat – Petropavldaǵy notarıýstyq keńselerdiń birine qaraqshylyq shabýyl jasaǵan kúdikti ustaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, 2 maýsym kúni Petropavl qalasy Jambyl kóshesi boıyndaǵy jeke notarıýstyń keńsesine qaraqshylyq shabýyl jasalǵany týraly habarlama túsken. Betperde kıgen er adam pyshaqpen qorqytyp, áıeldiń altyn buıymdary men aqshasyn alyp ketken.
Oblystyq PD bastyǵynyń orynbasary Rýslan Nazarovtyń aıtýynsha, qaraqshylyq deregi Sotqa deıingi tergep-tekserýdiń biryńǵaı tizilimine tirkeldi. Qylmysty ashý úshin qalalyq polıtsııa bóliminiń jeke quramy túgel jumyldyryldy. Qylmysty «gastrolerlerdiń» biri jasady degen boljam boldy. Osyǵan baılanysty qylmys jasalǵan aýdandaǵy beınebaqylaý kameralarynyń jazbalary zerdelenip, páter bıýrolary, jalǵa tapsyrylǵan páterler men saıajaı qoǵamdastyqtary tekserildi.
Nátıjesinde kúdikti sol kúni-aq anyqtaldy. Kókshetaý qalasynyń 1996 jylǵy týmasy múliktik qylmys jasaǵany úshin buryn sotty bolǵan. Eldiń basqa óńirlerindegi tártip saqshylaryna oǵan qatysty baǵdar joldanǵan.
Polıtseıler ony Qaraǵandyda ustaǵan. Ol bul qalada da qaraqshylyq jasap, qolǵa tústi. Qazirgi ýaqytta qylmystyq istiń materıaldary Qaraǵandy qalalyq polıtsııa basqarmasyna berý úshin daıyndalýda.
