Qaraqshylyq shabýyl jasaǵany úshin izdeýde júrgen er adam Reseıden ekstradıtsııalandy

ASTANA. KAZINFORM – Qazaqstan Respýblıkasynyń Bas prokýratýrasy Qazaqstan azamatyn qaraqshylyq shabýyl jasaǵany úshin qylmystyq jaýaptylyqqa tartý maqsatynda Reseı Federatsııasynan ekstradıtsııalady.

Kúdikti 2023 jyldyń tamyz aıynda Pavlodarda bireýdiń múlkin zorlyq-zombylyq arqyly ıemdený maqsatynda osy qylmysty jasaý úshin tanysymen qylmystyq kelisimge kelgen.

Josparlaryn júzege asyrý úshin kúdiktiler túngi ýaqytty paıdalanyp, mas kúıinde buryn tanys bolǵan jábirlenýshini qarańǵy jerge aparyp, esinen tanyp qalǵansha uryp-soǵyp, 200 myń teńge mólsherdegi múlkin jymqyrǵan. Kóptegen dene jaraqattarynyń saldarynan jábirlenýshiniń densaýlyǵyna aýyrlyǵy ortasha zııan keltirilgen.

Sybaılastardyń biri buǵan deıin 5 jylǵa bas bostandyǵynan aıyrylǵan, al ekinshi aıyptalýshy qashyp ketken, sol sebepti oǵan halyqaralyq izdeý jarııalanǵan.

2024 jyldyń sáýir aıynda ol Reseı Federatsııasynyń Túmen qalasynyń aýmaǵynda ustaldy, sodan keıin Qazaqstan Respýblıkasy Bas prokýratýrasynyń suraýy boıynsha Qazaqstanǵa ekstradıtsııalandy.

Qazir kúdikti ýaqytsha ustaý ızolıatoryna qamaldy.

Oǵan taǵylǵan qylmysty jasaǵany úshin múlki tárkilenip, 5 jyldan 10 jylǵa deıingi merzimge bas bostandyǵynan aıyrý jazasy kózdelgen.