Qaraqshylyq shabýyl jasady degen kúdikti Reseıden ekstradıtsııalandy
ASTANA. KAZINFORM – Qazaqstan Respýblıkasynyń Bas prokýratýrasy qylmystyq toptyń quramynda qaraqshylyq shabýyl jasaǵany úshin qylmystyq jaýapkershilikke tartý maqsatynda kúdiktini Reseı Federatsııasynan ekstradıtsııalady. Bul týraly Qazaqstan Bas prokýratýrasynyń baspasóz qyzmeti málim etti.
«Kúdikti 2015 jyly tanystarymen aldyn ala sóz baılasyp, Qaraǵandy oblysy Shahtınsk qalasyndaǵy meıramhanalardyń birine qaraqshylyq shabýyl jasaǵan. Qylmystyń nátıjesinde meıramhana ıesine 46 mln. teńgeden astam materıaldyq zalal keltirilgen. Kúdiktiniń seriktesteri qylmystyq jaýapqa tartyldy, al kúdikti boı tasalap, halyqaralyq izdeýge jarııalandy», — dep habarlady prokýratýradan.
Aǵymdaǵy jyldyń mamyr aıynda ol Reseı Federatsııasynyń Rostov oblysynda ustaldy, sodan keıin Bas prokýratýranyń suraýy boıynsha Qazaqstanǵa ekstradıtsııalandy. Qazirgi ýaqytta kúdikti tergeý ızolıatoryna qamaldy. Atalǵan qylmys úshin múlki tárkilenip, on jyldan on bes jylǵa deıingi merzimge bas bostandyǵynan aıyrý jazasy qarastyrylǵan.
Buǵan deıin Bas prokýratýra men Іshki ister mınıstrliginiń qyzmetkerleri Qazaqstan Respýblıkasy Syrtqy ister mınıstrliginiń kómegimen asa iri mólsherde sıntetıkalyq esirtki quraldaryn saqtaǵany jáne tasymaldaǵany úshin qylmystyq jaýapkershilikke tartý maqsatynda Grýzııadan Qazaqstan azamatyn ekstradıtsııalaǵan edi.
