Qarakólge quıylyp jatqan qara tústi suıyqtyqtan synama alyndy

AQTAÝ. QazAqparat – Mańǵystaýdaǵy Qaraqııa-Qarakól memlekettik zoologııalyq qaýmalynyń bóligi – Qarakól kóline quıylyp jatqan qara tústi suıyqtyqtan synama alyndy, dep habarlaıdy QazAqparat tilshisi.

11 qyrkúıekte Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasy men «Ústirt» qoryǵynyń ókilderi kólge belgisiz suıyqtyqtyń quıylyp jatqanyn taspalaǵan. Osyǵan baılanysty, Mańǵystaý oblysy boıynsha ekologııa departamentine jospardan tys tekseris uıymdastyryp, tekserý jumystaryna táýelsiz ekologtar retinde «EcoJer» qaýymdastyǵynyń oblystaǵy aımaqtyq keńesiniń múshelerin qatystyrý týraly hat joldaıdy.

Kólge quıylyp jatqan suıyqtyqtan synama alynyp, tıisti aktiler toltyryldy. Quramy tıisti saraptamadan keıin belgili bolady.

«Baqylaýshy organdardyń Qarakól kóline qaldyq sýlardy aǵyzýǵa bergen kelisimderi men ruqsat berý sharttarynyń oryndalysy tekserilýi kerek. Bul ásirese, «Rıksos» qonaqúıi (aqpan aıynda aǵyzylǵan qaldyq sýlar boıynsha) men «Batys ınjınırıng grýp» JShS-ǵa (sońǵy qara tústi sýdyń aǵyzýy boıynsha) qatysty jáne kináli tulǵalardy zań boıynsha qatań jazalaý kerek», - deıdi «EcoJer» qaýymdastyǵy jergilikti keńesiniń múshesi Ádilbek Qozybaqov.

Sondaı-aq, ol Qarakólge qonaqtaıtyn qustardy tamashalaýǵa jaǵdaı jasaý týraly oıymen bólisti.

«Qarakól sýynyń teńizge quıylatyn jerine shlıýz salýǵa jáne qustardy tamashalaýǵa jaǵdaı jasalsa jaqsy bolar edi. Atap aıtqanda, baqylaý munaralaryn, ekologııalyq soqpaqtar, avtokólik turaǵyn salynsa», - deıdi ol.

Qarakól kóli – respýblıkalyq máni bar erekshe qorǵalatyn tabıǵı aýmaq. Munda qustardyń 170-ten astam túri kezdesedi.

Eske salsaq, mamyrda Kaspııge quıylyp jatqan qara suıyqtyqqa qatysty synamalar alynǵan edi.