Qarakólde Qyzyl kitapqa engen suńqyldaq aqqýlar qystap qalǵan
AQTAÝ. KAZINFORM — Aqtaý qalasynan 10 shaqyrym qashyqta ornalasqan Qarakól kólinde 200-den astam aqqý qystap jatyr. Sonyń ishinde Qazaqstannyń Qyzyl kitabyna engizilgen suńqyldaq aqqý da bar.
Jýyrda Qarakól kólinde sýda júzetin jáne sý mańaıy qustarynyń 60-shy halyqaralyq qysqy sanaǵy ótken.
Soǵan sáıkes kólde 200 ge jýyq sybyrlaq aqqý, 150 ge jýyq qasqaldaq, 100 shaqty ógizshaǵala, 50-ge jýyq baryldaýyq úırek pen 20 shaqty saryaıdar úırek bar.
Sonymen qatar, 7 suńqyldaq aqqý, 3 saz quladyny, 2 aqquıryqty sýbúrkit pen 1 kókqutan esepke alynǵan.
— Sanaq barysynda sırek kezdesetin qustar da kezdesti. Mysaly, suńqyldaq aqqý men aqquıryqty sýbúrkit Qazaqstannyń Qyzyl kitabyna engizilgen, ıaǵnı erekshe qorǵaýdy talap etetin qustar, — deıdi ECOJER aımaqtyq ekologııa keńesiniń tóraǵasy Ádilbek Qozybaqov.
Sanaqty Aqtaý qalasyndaǵy Nazarbaev Zııatkerlik mektebiniń ekologııa boıynsha úılestirýshisi Baqytgúl Ómirhanqyzynyń jetekshiligimen «Ekolıder» volonterlik klýby «Qarakól saqshylary» jasaǵynyń belsendi músheleri Ústirt memlekettik tabıǵı qoryǵy qyzmetkerleriniń qatysýymen júrgizgen.
Buǵan deıin, Aqtaýda álsirep, usha almaı qalǵan eki aqqý qutqarylǵan bolatyn.
