Qarakólde qyrylǵan aqqýlar sany tórt júzden asyp jyǵyldy
Mańǵystaý oblysyndaǵy Qarakólde qyrylǵan aqqýlardyń sany 400-den asty. Bul týraly óńirlik orman şarýashylyǵy jáne janýarlar dúnıesi aýmaqtyq ınspektsııasynyń basshysy Ǵabbas Dosatov málimdedi, dep habarlaıdy Kazinform.
Aqqýlardyń qyrylýynyń sebebi retinde qus týmaýy ekeni buǵan deıin belgili boldy. Alaıda 21 jeltoqsannan beri qus tóresiniń qyrylýy tolastar emes.
«Qazirgi ýaqytta aqqýlardyń qyrylýyna qatysty tıisti jumystar jalǵasyp jatyr. Bizdiń ınspektorlar olardyń naqty sanyn anyqtady. Jeltoqsan aıynan beri qyrylǵan aqqý sany 412-ge jetip otyr. Al olardy joıý, vaktsınatsııalaý sekildi jumystarmen aınalysý bizdiń quzyretimizge kirmeıdi», - dedi basqarma basshysy Ǵabbas Dosatov.
Al Mańǵystaý oblysy Veterınarııa basqarmasynyń basshysy Berdibek Marqabaev Qarakóldegi qustardyń qyrylýyn qorektiń jetispeýimen túsindirdi. Onyń sózinde, oblys boıynsha 2023 jyldyń kúz mezgilinen beri bes myńnan astam qus vaktsınatsııadan ótken.
«Munaıly, Túpqaraǵan, Qaraqııa aýdany men Aqtaý qalasy aýmaǵyn mekendeıtin qustar legi vaktsınatsııalanǵany belgili. Olaı deıtinimiz, bul teńizge jaqyn ornalasqan aımaq sanalady. Oblysta aqqýlardyń qyrylýynyń birneshe sebebi bar. Jappaı qyrylýyn qustardyń ımmýnıtetiniń álsizdigi men qorektik zattardy tolyq taba almaýymen baılanystyryp otyrmyz», - dedi Berdibek Marqabaev.
Aıta ketetin jaıt, Mańǵystaý oblysyndaǵy Karakól aýmaǵynda sý synamalaryn tekserý kezinde shekten tys kontsentratsııasynan aspaǵanyn anyqtady. Bul oraıda Ekologııa departamenti kóldiń sýy qustar úshin qaýipti emes ekenin málimdegen bolatyn.
Sondaı-aq Mańǵystaý oblysynda erekshe qorǵaýdaǵy Qarakól kóliniń jaǵasynan aqqýlardyń óleksesi tabylǵan soń tıisti saraptama jumystary jasaldy. Qazirgi ýaqytta qustardy joıý jumystary veterınarııalyq zańnamada belgilengen tártippen júzege asyrylyp jatyr.
