Qarakóldegi aqqýlarǵa Rixos qonaqúıinen aqqan qaldyq sýdyń kesiri tıdi me
Aqtaýda Qarakólde qyrylǵan aqqýlardyń sany 828-ge jetti, dep habarlaıdy Kazinform.
Bul aqparatty Mańǵystaý oblystyq Orman sharýashylyǵy jáne janýarlar dúnıesi aýmaqtyq ınspektsııasynyń basshysy Ǵabbas Dosatov rastady. Onyń aıtýynsha qazir osyǵan qatysty keshendi jumystar jalǵasyp jatyr.
«21 jeltoqsannan beri úsh apta ishinde qyrylǵan aqqý sany 828-den asty. Osyǵan oblys ákimi janynan arnaıy jumys toby quryldy. Atalǵan top qustardyń qyrylýyna qatysty tıisti jumystardy atqaryp, zerttep, zerdeleıtin bolady», — dedi Ǵabbas Dosatov.
Sondaı-aq Aqtaýdaǵy Rixos qonaqúıiniń jerasty qubyrynan Qarakól kóline aǵyp jatqan aǵyndy qaldyq sýdyń saldarynan aqqýlardyń qyrylýy múmkin ekenin kópshilik aıtyp, dabyl qaqty. Áleýmettik jelilerde keń taralǵan beınejazbada Rixos qonaqúıiniń qaldyq sýy qubyr arqyly Qarakól kóline tógip jatqany anyq baıqalady. Buǵan qatysty Mańǵystaý oblystyq Ekologııa departamenti aqparattyń qanshalyqqy ras ekenin ekologterdiń saraptamasy jáne ornıtologterdiń qorytyndysy boıynsha anyqtaıtynyn atap ótti.
«Ekologııa departamenti Rixos qonaqúıine qatysty jospardan tys tekserý taǵaıyndady. Qarakól sýyn taldaý nátıjesi boıynsha lastaýshy zattardyń shekti ruqsat etilgen kontsentratsııasynan asyp ketkeni anyqtalsa, qonaqúıge aıyppul salynýy múmkin. Biraq ákimshilik aıyppul kólemi ázirge belgisiz», — dedi departamenttiń baspasóz qyzmeti.
Eki jyl buryn Rixos qonaqúıin qaldyq aǵyndy sýdy Kaspıı teńizine aǵyzǵany úshin 76 mıllıon teńge kóleminde aıyppul salynǵan bolatyn. Atalǵan qonaq úı Aqtaý qalasynan 20 shaqyrym jerde Kaspıı teńiziniń jaǵalaýynda ornalasqan.
Mańǵystaýdaǵy Qarakól kóli sýly-batpaqty alqaptardyń biri bolǵandyqtan erekshe qorǵalatyn tabıǵı aýmaq qataryna jatady. Respýblıkalyq mańyzy bar Qaraqııa-Qarakól memlekettik zoologııalyq qoryǵynyń quramyna kiredi. Munda elimizdiń Qyzyl kitabyna jáne Halyqaralyq tabıǵat qorǵaý odaǵynyń Qyzyl kitabyna engen qustardyń 20-dan astam túri mekendeıdi. Olardyń ishinde óte sırek kezdesetin dalmat pelıkany men aqbas úıregi bar.
