Qarakól qoıy tuqymyn asyldandyrý jumysy erekshe kóńil bólýdi qajet etedi - Q. Bısenov

Búgin QR Parlamenti Májilisiniń jalpy otyrysynda depýtat Qylyshbaı Bısenov Úkimet basshysynyń atyna joldaǵan saýalynda osylaı málim etti.

«Qarakól sharýashylyǵy - elimizdiń shól jáne shóleıitti aımaqtarynyń ekonomıkasynda erekshe oryn alatyn Qazaqstannyń qoı sharýashylyǵyndaǵy keleshegi mol salanyń biri. Onyń basty ónimi estetıkalyq jaǵynan qundy bolyp esepteletin qarakól eltirisi, sondaı-aq qoı eti, iri talshyqty jún óndirý bolyp tabylady», - deıdi Q. Bısenov. Onyń aıtýynsha, 1990 jyly elimizde qarakól qoıynyń sany 6,2 mln-ǵa jetken. Otar qurylymyndaǵy analyqtardyń úles salmaǵy 70 paıyz shamasyn qurap, jyl saıyn 2,5 mln dana qarakól eltirisi óndirilipti. Al 2010 jyldyń 1 qańtaryna qarakól qoıynyń sany tómendep, 1,1 mln-ǵa túsip ketken.

«Qyzylorda oblysy qoı sharýashylyǵy salasynda tek qana qarakól qoılaryn ósirýmen aınalysatyn respýblıkanyń negizgi aımaqtarynyń biri bolyp tabylady. 1990 jyldardyń basynda qarakól qoıyn ósirýmen aınalysatyn 30 keńsharda 1,2-2,3 mln. bas qarakól qoıy boldy. Bul respýblıka boıynsha 22,3 paıyzdy quraıtyn. Qazirgi kezde qarakól qoılarynyń sany 70 paıyzǵa deıin kemip ketken. Al oblys kólemindegi shól jáne shóleıtti jaıylymdar qarakól sharýashylyǵyn tıimdi damytýǵa múmkindik beredi. Qarakól qoıy tuqymynan basqa aýylsharýashylyǵy maldarynyń birde-bir túri Qazaqstannyń, sondaı-aq Qyzylorda oblysynyń shól jáne shóleıtti aımaǵynyń qatań jaǵdaılaryna jaqsy beıimdelmegen. Al bul qoı tuqymy uzaq qashyqtyqta jaıyla alady (táýligine 10-15 shaqyrymǵa), ishilgen sýdyń joǵary mıneraldanýyn jáne aýa temperatýrasynyń kúrt aýytqýyn jaqsy kóteredi. Onyń ústine qarakól qoıy tuqymy álemdegi erteden kele jatqan mal tuqymdarynyń biri bolyp tabylady. Sondyqtan, bul qoı tuqymyn saqtaý jáne onyń basyn kóbeıtý shóldi-shóleıtti aımaqtar úshin óte qajet. Osyǵan oraı, osy qoı tuqymyn asyldandyrý jumystaryna jáne ony kóbeıtýdiń máselelerine erekshe kóńil bólý qajet»,- deıdi depýtat.