Qaraqat terip nápaqa tabýdyń qıynshylyǵy kóp – aqmolalyq
AQMOLA OBLYSY. QazAqparat – Elorda mańyndaǵy «jasyl beldeýde» jıdek terý maýsymy aıaqtalýǵa jaqyn. Bıyl qaraqat tergen adamdar ótken jyldarǵa qaraǵanda óte kóp deıdi Aqmola oblysy Shortandy aýylynyń turǵyny Aıbolat Soltanbaıuly.
Aıbolat Soltanbaıuly QazAqparatqa karantın kezinde qalaı nápaqa taýyp otyrǵanyn jáne qaraqat terýdiń qıynshylyqtary, maýsymdyq jumystyń erekshelikteri týraly aıtyp berdi.
Qaraqat terý maýsymdyq jumys
Men ózim 7-8 jyldan beri qaraqat terip, nápaqa tabamyn. Qaraqat terý maýsymy - jalpy 45 kúndi quraıdy. Onyń ishinde jaýyn-shashyndy kúnderi jıdek terýge barmaımyz. Osy kezeń ishinde úlgerip, sál de bolsyn aqsha taýyp qalýǵa tyrysamyn. Qaraqatty terýdiń ózindik tehnıkasy bar. Ol árıne jeke tájirıbe arqyly keledi. Jıdek teretin adamdar qaı jerde qaraqat kóp ekenin shamamen bolsyn bilýi tıis, ol bir. Ekinshiden, adam jyldam qozǵalsa ǵana jıdekti kóp jınaı alady. Men 7-8 jyldyq tájirıbem boıynsha aıtsam, eń jaqsy jumys isteıtin adam kúnine 25 lıtrge deıin qaraqat tere alady.
Otbasylyq tabys kózi
Qaraqat terý kásibi eń birinshi otbasylyq jumys bolǵanda tabysty eseleıdi. Mysaly, otbasynda eresek balalary barlar jınalyp, qaraqat terýge barsa jaqsy aqsha tabýǵa múmkindik bar. Elorda mańyndaǵy aýyl turǵyndarynyń kópshiligi qaraqat terip, odan túsken qarajatqa kúzgi jem-shóbin, balalarynyń oqý-quraldaryn alady. Bul tıyn sanap, otyrǵan turǵyndar úshin barynsha kómek ári aqsha tabýdyń múmkindigi. Alaıda qaraqat terip, úı aldym, mashına aldym degen sózder sál shyndyqqa janaspaıdy. Shamamen bir adam qaraqatty úzbeı 30-35 kún tergende 300 myń teńgedeı tabys tabady.
Bıyl qaraqat teretin adamdar óte kóp
Bıyl jıdek teretin adamdar sany jyldaǵydan kóp. Basqa oblystardan kelip, týystarynyń úıine jatyp, nápaqa taýyp jatqan adamdardy bilemin. 5 lıtr shelek qaraqatty 1500-1800 teńgege saýdalaımyz, ótken jyly ol baǵa 900-1000 teńge shamasynda bolǵan.
Qaraqat terip nápaqa tabýdyń qıynshylyǵy kóp. Kúni boıy tergen qaraqatymyz keı kezderi iske aspaı, shirip ketetin jaǵdaılar bolady. Onyń basty sebebi ónimdi alýshy bolmaı qalady... Qaraqatty jaqsy baǵaǵa ári jyldam ótkizýdiń joldary qıyn. Joldyń ústine turyp satýǵa bolmaıdy, ol zańǵa qaıshy ári qaýipti. Sońǵy 7-8 jyl ishinde qaraqat satý úshin jolǵa shyqqandar arasynda túrli qaıǵyly jaǵdaılar boldy. Kóp jaǵdaıda qaraqattyń paıdasyn alypsatarlar kórip jatady. Olar bizden arzan baǵaǵa satyp salyp, ústinen eselep qosyp satady. Alaıda biz olarǵa amalsyzdan berýge májbúrmiz. Áıtpese eńbegimiz esh ketedi.
