«Qaraqat» mektep-stýdııasynyń tárbıelenýshileri Túrkııada ótken festıvalden Gran-prımen oraldy
ASTANA. QazAqparat - «Qaraqat» mektep-stýdııasynyń tárbıelenýshileri «Golden sun» baıqaýynda bas júldeni ıelendi.
Bul óner básekesi 3-10 mamyr aralyǵynda Antalııa qalasynyń mańynda birinshi «IAF» halyqaralyq óner festıvaliniń aıasynda ótti.
«Shyǵarmashylyq baıqaýdyń tóreshileri joǵary marapatty «vokal» atalymynda qatysqan «Jadyra» vokaldyq tobyna berdi. Jeke jarysqa túsýde birinshi oryn Tomırıs Bekmurzınaǵa buıyrdy», - dep habarlady QazAqparat tilshisine mektep-stýdııanyń qyzmetkerleri.
Festıvaldiń maqsaty - etnıkalyq ónerdi nasıhattaý, túrli el halyqtarynyń arasynda beıbitshilik pen jaqyn dostastyq qarym-qatynasty nyǵaıtý.
Jas talanttar horeografııa, vokal, bı teatry, ınstrýmentaldy janr jáne folklor atalymdary boıynsha synǵa tústi. Festıvalge Qazaqstan, Reseı men Túrkııadan shyǵarmashylyq ujymdar qatysty.
Shara barysynda sheberlik synyptary, kontsertter, mıss jáne mıster «Golden sun» konkýrstary, Antalııanyń shyǵarmashylyq ujymdarymen kezdesýler uıymdastyryldy.
