Qaraqat Ábden Qyzylorda oblysynyń turǵyndarymen kezdesti

QYZYLORDA. QazAqparat – Prezıdenttikke kandıdat Qaraqat Ábdenniń Qyzylorda oblysyndaǵy saılaýaldy kezdesýleri ótti. Ol jaqyn jáne shalǵaı jatqan eldi mekenderdiń jaǵdaıymen tanysyp, Aral qalasyna at basyn burdy. Bul týraly QazAqparat kandıdattyń shtabyna silteme jasaı otyryp habarlaıdy.

Oblystaǵy úlken aımaqtardyń biri bolyp sanalatyn Aral qalasynda ol jergilikti halyqpen júzdesip, saılaýaldy baǵdarlamasyn tanystyrdy. Budan bólek, kandıdat osy óńirde ulttyq jáne otbasylyq qundylyqtardy negizge alyp, kásibin dóńgeletip otyrǵan otbasylyq bıznes ókilderimen kezdesti.

Aralda qozǵalǵan mańyzdy taqyryptar Qyzylorda qalasyndaǵy kezdesýde jalǵasyn tapty. Jıyn barysynda qoǵamdaǵy ózekti máseleler, óskeleń urpaq pen jastar tárbıesi, otbasy ınstıtýtynyń máni talqylandy.

Eske salsaq, elimizde 20 qarasha kúni kezekten tys prezıdent saılaýy ótedi. Úmitker Qaraqat Ábden el aımaqtaryn aralap, 13 qala men birneshe aýyldyq eldi mekende 20-dan astam kezdesý ótkizdi. Aldaǵy ýaqytta ol Soltústik Qazaqstan, Túrkistan, Jambyl oblystarynyń saılaýshylarymen kezdesý ótkizedi.

Foto: richscatering.com