Karakas pen Vashıngton AQSh-qa munaı eksporttaý múmkindigin talqylap jatyr

ASTANA. KAZINFORM — AQSh pen Venesýela venesýelalyq munaıdy amerıkalyq munaı óńdeý zaýyttaryna eksporttaý múmkindigin talqylap jatyr. Bul týraly Reuters agenttigi bes derekkózge silteme jasap habarlady.

Yqtımal kelisim Qytaıǵa baǵyttalǵan ónimdi qaıta baǵdarlaýǵa múmkindik berip, sonymen qatar Venesýelanyń memlekettik munaı kompanııasy PDVSA-ǵa óndirý kóleminiń odan ári kúrt qysqarýyna jol bermeýge kómektesýi múmkin.

Agenttiktiń jazýynsha, bul kelissózder Venesýela úkimetiniń AQSh prezıdenti Donald Tramptyń salany amerıkalyq munaı kompanııalaryna ashý jónindegi talabyna bergen alǵashqy jaýaby. Buǵan deıin Tramp ýaqytsha prezıdent Delsı Rodrıgestiń AQSh pen jeke kompanııalarǵa Venesýelanyń munaı ónerkásibine «tolyq qoljetimdilik» berýin qalaıtynyn málimdegen edi.

Reuters atap ótkendeı, Venesýelanyń qolynda tankerlerge tıelgen jáne qoımalarda saqtalǵan mıllıondaǵan barrel munaı bar, alaıda olardy jóneltý múmkin emes. Buǵan Tramptyń jeltoqsan aıynyń ortasynda engizgen tosqaýyly sebep bolyp otyr.

Agenttiktiń eki derekkózine súıensek, AQSh-qa satylýy múmkin turyp qalǵan munaı kólemi jónindegi yqtımal kelisimniń alǵashqy kezeńi bastapqyda Qytaıǵa arnalýy tıis bolǵan partııalardy qaıta bólýdi talap etýi múmkin.

«Tramp munyń múmkindiginshe tez júzege asqanyn qalaıdy, óıtkeni ol muny iri saıası jeńis retinde kórsetkisi keledi», dedi agenttiktiń munaı salasyndaǵy derekkózderiniń biri.

Aq úı ókilderi, Venesýela úkimeti men PDVSA bul máselege qatysty ázirge túsinikteme bergen joq.

Aıta keteıik, Nıý-Iorkte BUU Qaýipsizdik keńesiniń Venesýela boıynsha shuǵyl otyrysy ótti.