Qaraqalpaqstandyq qandastar Almatyda Naýryz meıramyn atap ótti
Naýryz merekesinde Jańadarııa aýylynan Qazaqstanǵa oralǵan qandastar ǵana emes, áli de turyp jatqandary arnaıy kelip qatysty.
«Naýryz kóje» pisirilip, án, terme, kúıler oryndalǵan Ulystyń uly kúninde Amanjol Esmyrzaev, Islam Qaırýllauly, Beken Arzıev, Abaı Sádýov, Muhametjan Shákimalov, Aıdar Mókeshov syndy ánshi-termeshiler óz ónerinen shashý shashyp, kópshiliktiń qoshemetine bólendi. Sonymen qatar qazaq kúresi, arqan tartys jáne basqa da ulttyq sport oıyndary uıymdastyryldy. Aýyl qarttary týǵan jer týraly estelikter aıtyp, dúnıeden ótken ata-babalar rýhyna duǵa baǵyshtady.
Sonymen qatar Naýryz meıramynda «Bizdiń aýyl» dep atalatyn mádenı, tarıhı-tanymdyq jýrnal shyǵaryldy. Basylymda Taqtakópir, Jańadarııa óńirindegi qazaqtardyń tarıhy, dinı-aǵartýshylar týraly, ulttyq ónerdiń damýyna úlesterin qosqan ánshi, dombyrashy, jyraýlar jáne búginde umytylyp bara jatqan jer-sý ataýlary, aýyl atyn respýblıkaǵa tanytqan «Arqabaıdyń qara jorǵasy», «Pahratdınniń ala aty» sııaqty sáıgúlikter týraly tanymdyq maqalalar jarııalandy.
1975 jyly Jańadarııa keńsharyn qurǵan dırektor, búginde 92 jasqa kelgen aqsaqal Orazaly Iimbetov: «Búginde Jańadarııa aýlynan shyqqan azamattardyń baǵyndyrǵan bıikterine, yntymaq-birligine qarap otyryp shúkirshilik etemin. Urpaǵyna tereń bilim bergen, adamgershilikke, ımandylyqqa baýlyǵan, yntymaǵy jarasqan aýyldyń uıytqysy bolǵan kezimdi erekshe saǵynyshpen eske alamyn. Eńbegimniń esh ketpegenine qýanamyn», - dedi.
Taqtakópir aýdanynyń Jańadarııa keńsharynan qazaqtyń jyraýlyq ónerin ózindik órnegimen baıytqan Ótim Baltýǵanuly, Teńizbaı Esenbaıuly, Pishenbaı Bekishev syndy ataqty jyraýlar shyqsa, bertin kele balalar jazýshysy, B.Bulqyshev atyndaǵy syılyqtyń laýreaty Qazaq radıosynyń tilshisi bolǵan Baqyt Dosymov, «Daryn» Memlekettik jastar syılyǵynyń laýreaty, jýrnalıst Ǵ.Іskenderuly, Qurmanǵazy atyndaǵy ulttyq halyq aspaptary orkestriniń dombyrashysy, QR Mádenıet salasynyń úzdigi Jubathan Tájbenov, birneshe ǵylymı eńbektiń avtory, hımııa ǵylymdarynyń kandıdaty Indıra Saparbekova, «Bilim berý salasynyń úzdigi» Dına Saıekeeva, Qurmanǵazy atyndaǵy Qazaq ulttyq konservatorııasynyń ustazy, Besqala qazaqtarynyń mýzykasyn zertteýshi, QR Mádenıet salasynyń úzdigi, jyrshy Kúnqoja Qaırýlla, Y.Altynsarın atyndaǵy tósbelgi ıegeri, pedagog Tamara Esjanova jáne taǵy da basqa tulǵalar shyqqan.
Belgili pedagog Qaırat Shahanov jáne basqa azamattar uıymdastyrǵan Naýryz merekesine arnalǵan is-shara eki el ortasyndaǵy yntymaqty nyǵaıta túsetini sózsiz.
