Qaraqalpaqstandaǵy «Moınaq» ken ornyn burǵylaý kezinde gaz atqylady

TAShKENT. KAZINFORM – Qaraqalpaqstannyń Moınaq aýdanynda ornalasqan «Moınaq» ken ornynda júrgizilip jatqan burǵylaý jumysynyń barysynda aýaǵa gaz atqylady, dep habarlaıdy Kazinform agenttiginiń menshikti tilshisi.

Eldiń Energetıka mınıstrliginen málim etkendeı, 26 shildede 5 myń metr tereńdikte dep boljam jasalǵan gaz kenine uńǵyma ornatý úshin burǵylaý jumysy júrgizilgen. Degenmen kógildir otyn 4,7 myń tereńdikten shyǵa bastaǵan.

- Uńǵymadaǵy gaz qysymyn tómendetý jáne onyń yqtımal saldaryn joıý boıynsha jumys júrgizilip jatyr. Oqıǵa ornyna barǵan «Ózbekmunaıgaz» AQ, Tótenshe jaǵdaılar mınıstrligi, «Ózbekgeofızıka» AQ jáne jergilikti ákimdiktiń mamandary tıisti sharalardy qabyldap jatyr. Bastysy - uńǵyma eldi mekenderden alys ornalasqan jáne aýaǵa atqylap jatqan gaz quramynda zııandy kúkirtsýtegi joq, - delingen mınıstrliktiń resmı habarlamasynda.

Eske salaıyq, bıyl aqpanda Ózbekstannyń Buhara oblysyndaǵy «Buhara-Oral» magıstraldyq gaz qubyrynyń 106 shaqyrymynda apat bolǵan edi. Sonmen qatar mamyrda Ózbekstannyń Surhandarııa oblysyna qarasty Baısýn aýdanynda ornalasqan «Mýstaqıllık-25» («Táýelsizdik-25») ken ornynda quramynda kúkirtsýtegi joǵary gaz atqylady.

Qosa ketsek, bıyl jarty jylda Ózbekstannyń iri kásiporyndary 21,7 mlrd tekshe metr gaz óndirdi, bul ótken jyldyń sáıkes kezeńimen salystyrǵanda 700 mln tekshe metrge az.

Kógildir otyn óndirisin ulǵaıtý maqsatynda atalǵan el úkimeti bıyl 15 ýchaskede geologııalyq barlaý júrgizbek.