Qaraqalpaqstanda tótenshe jaǵdaı rejımi merziminen buryn toqtatyldy
TAShKENT. QazAqparat – Ózbekstan Prezıdenti Shavkat Mırzıeev Qaraqalpaqstan aýmaǵyndaǵy tótenshe jaǵdaı rejımin merziminen buryn toqtatý týraly jarlyqqa qol qoıdy. QazAqparattyń menshikti tilshisi bul týraly atalǵan el basshysynyń baspasóz qyzmetine silteme jasap habarlaıdy.
Mundaı sheshim Qaraqalpaqstan Joǵarǵy keńesiniń 20 shildede el prezıdentine joldaǵan ótinishinen keıin qabyldandy. Joǵarǵy keńes elde qoǵamdyq tártip qalpyna kelgenin, azamattardyń qaýipsizdigin qamtamasyz etý, olardyń quqyǵy men bostandyǵyn qorǵaý boıynsha sharalar qabyldanǵanyn atap ótken.
«2022 jylǵy 2 shildedegi № ÝP–164 «Qaraqalpaqstan Respýblıkasy aýmaǵynda tótenshe jaǵdaı rejımin engizý týraly» Ózbekstan Respýblıkasy Prezıdentiniń jarlyǵymen engizilgen Qaraqalpaqstan Respýblıkasy aýmaǵyndaǵy tótenshe jaǵdaı rejımi 2022 jyldyń 21 shildesi saǵat 05.00 mınýttan bastap merziminen buryn toqtatylsyn», - delingen qujatta.
Shavkat Mırzıeevtiń jarlyǵy bekitý úshin Olıı Májilis palatalaryna joldandy. Qujattyń oryndalýy Ózbekstan premer-mınıstri Abdýlla Arıpovke jáne Prezıdent janyndaǵy Qaýipsizdik keńesiniń hatshysy Vıktor Mahmýdovke júkteldi.
Eske salaıyq, Qaraqalpaqstan Respýblıkasynyń aýmaǵynda azamattar qaýipsizdigin qamtamasyz etý jáne tártipti qalpyna keltirý maqsatynda 2022 jyldyń 3 shildesinen 2 tamyzǵa deıin elde tótenshe jaǵdaı engizilgen bolatyn.
