Qaraqalpaqstanda Kórisý kúni toılandy
NÓKІS. QazAqparat - Ózbekstannyń Qaraqalpaq avtonomııaly respýblıkasy Ájinııaz atyndaǵy Nókis memlekettik pedagogıka ınstıtýtynda «Amal merekesi – Naýryz jarshysy» atty kesh ótti. Bul týraly Qaraqalpaqstan habar agenttiginiń tilshisi Islam Matekov habarlady.
Qazaq halqynyń ulttyq meıramdarynyń biri Kórisý kúnin Naýryzdyń bastalýy retinde Ózbekstandaǵy kóp ult, sonyń ishinde týysqan qaraqalpaq halqy da toılaıdy.
Bilim ordasynda ótken ádebı keshti ınstıtýt prorektory P.Kalhanov ashyp, jınalǵandardy Amal merekesi jáne Naýryz meıramymen quttyqtady.
Sharada kópke qazaq halqynyń ulttyq taǵamdary tartylyp, ınstıtýttyń túrki tilder fakýltetiniń qazaq tili men ádebıeti kafedrasy professor-oqytýshylary jáne stýdentteri ádebı-kórkem baǵdarlama usyndy.
Ásirese qazaq halqynyń ulttyq ádet-ǵuryptary, sonyń ishinde qyz uzatý, betashar kóptiń kóńilinen shyqty. Shara sońy án keshine ulasty.
