Qaraqalpaqstanda dınozavrdyń súıegi tabyldy

TAShKENT. KAZINFORM – Qaraqalpaqstanda shamamen 70 mıllıon jyl buryn ómir súrgen dınozavrdyń súıegi tabyldy, dep habarlaıdy Kazinform agenttiginiń menshikti tilshisi.

Ejelgi janýardyń qaldyqtary Qaraqalpaqstandaǵy Sultan Ýáıis taýynyń aımaǵynan anyqtaldy. Ol jerde Qaraqalpaq memlekettik ýnıversıteti men Ózbekstan memlekettik geologııalyq murajaıynyń ǵalymdary ekspedıtsııa júrgizdi. Arheologtardyń málimetinshe, atalǵan orynnan dınozavrdyń omyrtqa jáne jilinshik súıekteri tabylǵan.

— Tabylǵan qaldyqtar Mezozoı dáýiriniń Bor kezeńine tıisili bolýy múmkin. Qazirgi ýaqytta halyqaralyq sarapshylardy tarta otyryp, zertteý júrgizip jatyrmyz, — dedi «Oʻzbekiston 24» telearnasyna suhbat bergen Ózbekstan memlekettik geologııalyq murajaıynyń dırektory Ahmadjon Ahmedshaev.

Eske salaıyq, taıaýda Qyzylorda oblysynda dınozavrdyń súıegi tabylǵanyn jazyp edik.

Sondaı-aq, byltyr Tájikstanda 85 mıllıon jyl buryn ómir súrgen dınozavrdyń qaldyqtary tabyldy.