Qaraqalpaq birlestiginiń ókili: Qazaq tilinde sóılegenim – sol halyqqa degen qurmetim

ALMATY. QazAqparat - Qazaq tilinde sóılegenim- qazaq halqyna degen qurmetimdi bildiredi. Bul týraly Qazaqstanda turatyn qaraqalpaqtardyń etnomádenı birlestiginiń tóraǵasy Tazabıke Salıeva aıtty, dep habarlaıdy QazAqparat tilshisi.

«Qazaq jeri taǵdyr tálkegine ushyraǵan kóp ultty baýyryna basty, pana, qorǵan boldy. Neshe jyldan beri osynda turatyn kóp halyqtar memlekettik tildi bilýi tıis. Tipti qazaqtardyń ózderi tilin bilmeı sharshatady. Kez-kelgen eldiń tilin, ádet ǵurpyn bilmegen adam ol halyqtyń jan dúnıesin bilmeıdi. Qur rahmet aıtýdyń keregi shamaly. Meniń qazaq tilinde sóıleýim - qazaq halqyna degen qurmetim. Bizde Qaraqalpaqstanda kitaphanalarda qazaq tilindegi kitaptar tolyp tur»,- dedi Tazabıke Salıeva.

Birlestik basshysy Elbasynyń eren eńbegin Nur-Sultan qalasynyń túrlenýinen kórýge bolatynyn aıtty.

«Men alǵash kóship kelgen 2000 jyly Astana qalasy (Nur-Sultan – avt.) basqasha edi. Qazir álemniń belgili megapolısterimen boı talasa alady. Bul qazaq tarıhynyń sımvoly, nyshany. Qazaqtyń baqýattylyǵynyń belgisi», - dedi T.Salıeva.

Foto: astana.gov.kz