Qaraqalpaq ánshisi Astanada kontsert ótkizdi
Astana qalasyndaǵy ál-Farabı atyndaǵy Oqýshylar saraıynda ánshi, Ózbekstan men Qaraqalpaqstan Respýblıkalarynyń eńbek sińirgen ártisi Mahsetbaı Ótemuratov «Men aýyldy saǵyndym» atty kontsert berdi, dep habarlaıdy Kazinform.
Án keshinde Mahsetbaı Ótemuratov óz shyǵarmashylyǵyndaǵy halyq arasyna keń taraǵan týyndylardy oryndady. Qazaq ánderin de naqyshyna keltire shyrqady.
Kontsertte Astanadaǵy «Jaıhýn» qaraqalpaq etnomádenı birlestiginiń bıshileri óner kórsetti. Sondaı-aq «Qazaqstan daýysy» jobasynyń II maýsymynda fınalda baq synap jatqan Qaraqalpaqstanda turatyn talantty qandasymyz, barıton daýysty Musa Marat án aıtty. Mahsetbaı Ótemuratov Musa Maratqa óziniń aıtýly keshterde kıgen kostıýmin tartý etti.
Aıta keteıik, Mahsetbaı Ótemuratov 2001 jyly Ózbekstan Respýblıkasy Prezıdentiniń jas talanttarǵa arnalǵan «Nıhol» syılyǵynyń laýreaty atandy. 2005 jyly «Qaraqalpaqstan Respýblıkasynyń eńbek sińirgen ártisi» ataǵyn alsa, 2011 jyly «Ózbekstan Respýblıkasynyń eńbek sińirgen ártisi» atandy. Ol kópten halyqaralyq sahnalarda óner kórsetip júr. Kúni keshe ǵana qazaq ádebıetiniń kórnekti ókili, jazýshy Kemel Toqaevtyń 100 jyldyq mereıtoıy aıasynda halyqaralyq is-sharalarǵa qoldaý kórsetip, baýyrlas elderde onyń shyǵarmalaryn keńinen nasıhattaýǵa, ekijaqty mádenı baılanystardy nyǵaıtýǵa qosqan úlesi úshin Qazaqstan Prezıdentiniń Alǵyshatymen marapattaldy. Sondaı-aq Almatyda ótken «Jyl adamy» baıqaýynda «Altyn adam» atalymyn ıelendi. Ánshi búginde Nókis qalasyndaǵy Qaraqalpaqstan kórkemóner saraıynyń dırektory.
Bul kesh elordada 2016 jyly ashylǵan «Jaıhýn» qaraqalpaq etnomádenı birlestiginiń uıymdastyrýymen ótip otyr. Atalǵan birlestik qaraqalpaq mádenıetin nasıhattaý maqsatynda túrli mádenı, qaıyrymdylyq is-sharalaryn ótkizip keledi. Birlestik quramyndaǵy «Jaıhýn» bı ansambli men jas ánshiler de túrli sahnalarda óner kórsetip júr.
«Jaıhýn» qaraqalpaq etnomádenı birlestiginiń tóraıymy Tazabıke Salıeva qos halyqtyń dostyǵy jaıly jyly pikir bildirdi.
«Bizde ándi «qosyq» dep aıtady. Dombyramen án aıtýdy dýtarmen baqsylardyń án aıtýymen salystyrýǵa bolady. Batyrlardyń jyr-eposyn qobyzben oryndaıdy», - dedi ol.
Kontsertke Ózbekstan Respýblıkasynyń Qazaqstandaǵy elshiligi qyzmetkerleri de qatysty.
