Qaraǵusova elimizde kúnkóris deńgeıiniń ne úshin tómen ekenin túsindirdi
ALMATY. QazAqparat - Májilis depýtattarynyń jazǵy demalys kezinde saılaýshylarymen kezdesýi jalǵasyp jatyr. Búgin «Nur Otannan» saılanǵan, burynǵy Eńbek jáne halyqty áleýmettik qorǵaý mınıstri Gúljan Qaraǵusova almatylyq saılaýshylarymen kezdesti.
Almaty qalasy Bostandyq aýdany turǵyndarymen kezdesýde depýtat daıyndalǵan emes, ótkir suraqtardy batyl qoıýdy ótindi. Suraq qoıýshylardyń biri elimizde kúnkóris deńgeıi nege tómen ekenin surady.
«Barlyq elde kúnkóris deńgeıi tómen. Yńǵaısyz bolsa da, bul kórsetkish adamnyń fızıologııalyq júıe retinde fýnktsııasyn atqarýyna ǵana belgilengen soma. Túsinińiz, Qazaqstanda bul baǵa memleket kúnkóris deńgeıin kótergisi kelmegendikten osylaı belgilenip otyrǵan joq. Biz ony kótere alamyz. Biz joǵary zeınetaqy, jalaqy jasaı alamyz. Biraq, eńbektenip aqshany tabý kerek? Qaıdan alamyz? Bilesiz be, bir kópten beri paıdalanylmaı jatqan zań bar. Onda eńbek ónimdiligi kórsetkishi jalaqy ósimi kórsetkishinen joǵary bolýy kerek ekeni jazylǵan. Bizde kerisinshe, biz az óndiremiz, az tabamyz, biraq kóp jumsaımyz. Al barlyǵyn jep taýysamyz, sosyn she? Mine, sondyqtan, kúnkóris deńgeıi aqyryndap aýysady. Damyǵan elder óte jaqsy jasaǵan. Olar kúnkóris deńgeıimen eshteńeni baılanystyrmaıdy. Biz bolsaq, barlyǵyn kúnkóris deńgeıi kórsetkishimen ólsheımiz. Kez kelgen ózgeris bolsa boldy, tómengi jalaqy, barlyq tólemder, zeınetaqy men áleýmettik tólemderde ózgeris bolady. Aıta keteıin, bıyl kúnkóris kórsetkishi aıtarlyqtaı ózgerdi, oǵan mıllıardtaǵan qarjy ketedi. Bul tek, azyq-túlik jáne azyq-túlik emes kartalarynyń ózara ólshemin anyqtaýda ǵana bolǵan jaǵdaı», - dedi G.Qaraǵusova.
