Qaragóz beınesin somdaýshy jas aktrısa Tańsulý Muzapparovanyń sahnadaǵy debıýti ótkiziledi
ASTANA. 17 qańtar. QazAqparat. Q.Qýanyshbaev atyndaǵy qazaq mýzykalyq drama teatrynda 2011 jyldyń 21 qańtarynda M.Áýezovtiń «Qaragóz» tragedııasynyń «róldi jańǵyrtý» dástúri boıynsha Qaragóz beınesin somdaýshy jas aktrısa Tańsulý Muzapparovanyń sahnadaǵy debıýti ótkizilmek.
Alǵashqy premerasy 1999 jyly ótken bolatyn, sahnaǵa alǵash «Qaragóz» beınesin aktrısa Sholpan Muqysheva jáne QR jastarynyń «Serper» syılyǵynyń ıegeri Altynaı Nógerbek somdaǵan.
Araǵa 12 jyl salyp teatrdyń shyǵarmashylyq ujymy Á.Mámbetovtyń qoıylymdarynyń ǵumyryn uzartý, «róldi jańǵyrtý» dástúrimen jáne ónerge jańadan kelip jatqan jastardy qoldaý maqsatynda oǵan Qazaq Óner ýnıversıtetiniń «Akter sheberligi» mamandyǵynyń 4 kýrs stýdenti Tańsulý Muzapparovany laıyq dep tapty.
Tragedııada Qaragóz sulý segiz qyrly, bir syrly Narsha atty jigitke aıttyrylyp qoıylady. Mahabbattyń máńgilik dastanyna aınalǵan Qaragózdiń ómiri shym-shytyryq oqıǵaǵa toly. Ol atalas baýyry Syrymǵa ǵashyq bolady. Alaıda Qaragózdiń júreginde Syrymǵa degen alaýlaǵan mahabbat sezimi ony baqytty ete almaıdy...
