18:24, 15 Jeltoqsan 2022 | GMT +6
«Qaraǵaıly qurylys» JShS joq páterlerdi satyp jatyr - Almaty ákimdigi
ALMATY. QazAqparat - Jelide Graff premıým klasty turǵyn úı keshenderinen páterler satý týraly habarlandyrýlar tarap jatyr, dep habarlaıdy QazAqparat.
Almaty qalasy ákimdiginiń málimetinshe, qurylys salýshy «Qaraǵaıly qurylys» JShS qolma-qol esep aıyrysýdan bastap, ıpotekalyq nesıeleýge deıingi satyp alýdyń túrli nusqasyn usynýda. Alaıda, turǵyn úı keshenin jobalaý aldyndaǵy qujattama alynbaǵan, avtorlyq jáne tehnıkalyq qadaǵalaý joq, jer telimi úı salýǵa emes, jeke qosalqy sharýashylyq júrgizýge arnalǵan.
«Qazirgi tańda qala qurylysyn baqylaý basqarmasy qurylys salýshyǵa qatysty jospardan tys tekserýdi bastaıdy.
Jyljymaıtyn múlikti satyp almas buryn salynyp jatqan TÚK qujattarynyń bar-joǵyn tekserý qajet.
Muny Almaty qalasy qala qurylysyn baqylaý basqarmasynyń +7 (727) 229-81-36 jedel jelisi arqyly bilýge bolady», - dep jazdy ákimdikten.
