Qaraǵaıdy zańsyz kesken qaraǵandylyq ustaldy
QARAǴANDY. QazAqparat – Qarqaraly tabıǵat parkinde zańsyz túrde 8 qaraǵaı aǵashyn shaýap alǵan jergilikti turǵyn bórenelerdi óz avtokóligimen tasymaldamaqshy bolǵan.
Alaıda tabıǵat qorǵaý polıtsııasynyń qyzmetkerleri zań buzýshyny joldan ustap aldy, dep habarlaıdy QazAqparat tilshisi.
Aǵymdaǵy jyldyń 28 qyrkúıeginde Qarqaraly aýdanynyń aýmaǵynda ósimdikter men janýarlar álemin qorǵaý boıynsha reıdtik is-sharalar ótkizý kezinde Qarqaraly aýdanynyń tabıǵat qorǵaý polıtsııasynyń qyzmetkerleri «Qarqaraly-Egindibulaq» tasjolynyń Egindibulaq aýylyna kire berisinde 51 jastaǵy turǵyn basqaryp kele jatqan «Nıva 21213» markaly avtokóligin toqtatty.
Sholyp qaraý kezinde avtokóliktiń tirkemesinen uzyndyǵy 2 metrdi quraıtyn 8 dana kesilgen qaraǵaı tabyldy. Júrgizýshide bul aǵashtardy tasymaldaýǵa nemese satyp alýǵa qandaı da bir ruqsat qujattary bolmaǵan.
«Tekserý barysynda 51 jastaǵy er adam Qarqaraly aýdanynyń «Qý ormanshylyǵy» orman qorynyń aýmaǵyna 8 dana qaraǵaı zańsyz keskenin moıyndady», - dep habarlady Qaraǵandy oblysy PD baspasóz qyzmeti.
Atalǵan derek boıynsha QR QK 340-babynyń 2-bóligi boıynsha qylmystyq is qozǵaldy.
Qazirgi ýaqytta tergeý amaldary júrgizilýde.
