Qaraǵaı keskeni úshin orman ınspektorynyń avtokóligi tárkilendi
PAVLODAR. QazAqparat - Sharbaqty aýdandyq soty Besqaraǵaı aýdandyq «Ertis ormany» Memlekettik orman tabıǵı rezervaty» RMM fılıalynyń memlekettik ınspektoryna qatysty qylmystyq isti qarady, dep habarlaıdy «QazAqparat» HAA tilshisi.
«2018 jyldyń 29 qańtarynda aıyptalýshy eshqandaı ruqsat qujatynsyz 19 qaraǵaı aǵashyn kesip, shórkelep, kóligine tıep alyp oqıǵa ornynan tasa bolǵan. Ol memleketke 43 189 teńge shyǵyn keltirdi. Sot ınspektordy kináli dep tanyp, oǵan 1 jylǵa bas bostandyǵyn shekteý týraly jaza taǵaıyndady. Sonymen birge onyń ÝAZ-452d avtokóligi memleket paıdasyna tárkilenip alyndy»,-dep habarlaıdy aýdandyq sot.
Aıyptalýshy óz kinásin tolyq moıyndap, memleketke keltirgen shyǵyndy tolyǵymen ótegenin habarlady jáne jónindegi túbirtekti sotqa ákelip kórsetti.
Úkim zańdy kúshine tolyq engen joq.
Foto: sm-news.ru
