Qaraǵandy aýrýhanalaryna kesheli beri 28 kenshi jetkizildi
Bir táýlik aralyǵynda Qaraǵandy oblysynyń birneshe aýrýhanalaryna 28 kenshi jetkizildi. Onyń 24-i em alýǵa jatqyzylyp, qalǵandaryna alǵashqy medıtsınalyq kómek kórsetilip, tekserýden ótken soń ambýlatorııalyq em alýǵa jiberildi, dep habarlaıdy Kazinform.
Qaraǵandydaǵy Kostenko atyndaǵy shahtada jazataıym oqıǵa saldarynan zardap shekkender H.J. Maqajanov atyndaǵy oblystyq klınıkaǵa jáne basqa da medıtsınalyq mekemelerge jedel jetkizildi.
Daıyndalǵan dárigerler brıgadalary kelip túsken kenshilerdi jaǵdaılarynyń aýyrlyǵyna qaraı emdeýdi bastady.
Qaraǵandy oblysynyń densaýlyq saqtaý basqarmasynyń málimetine saı, Qaraǵandy, Abaı jáne Shahtınsk statsıonarlarynyń qabyldaý-dıagnostıkalyq bólimshelerine barlyǵy 28 adam jetkizildi. Onyń ishinde zardap shekken 24 kenshi aýrýhanaǵa jatqyzyldy:
- 20 kenshi jeńil jáne ortasha aýyrlyqtaǵy ýly gazdan ýlaný dıagnozymen H.J. Maqajanov atyndaǵy ShJQ KMK toksıkologııa bólimshesine emdeýge jatqyzyldy. Naýqastardyń jaǵdaıy turaqty, detoksıkatsııa jáne sımptomatıkalyq emdeý júrgizilýde;
- bir patsıent birneshe jaraqattarmen “Professor H.J. Maqajanov atyndaǵy kópsalaly aýrýhana" ShJQ KMK reanımatsııa jáne qarqyndy terapııa bólimshesinde emdelýde.
- zardap shekken taǵy bir kenshi “Professor H.J. Maqajanov atyndaǵy kópsalaly aýrýhana" ShJQ KMK jatqyzyldy, jaǵdaıy ortasha. Jaǵdaıynyń tómendeýi baıqalmaıdy;
- eki kenshi "Shahtınsk qalasynyń ortalyq aýrýhanasy" KMK terapııa bólimshesine ýly gazdardan ýlaný dıagnozymen jatqyzyldy, jaǵdaıy ortasha aýyrlyq dárejesine jaqyn.
Zardap shekkenderdiń keıbiri qabyldaý-dıagnostıkalyq bólimsheler deńgeıinde tekserilip, ambýlatorııalyq emdeýge jiberildi.
“Barlyq patsıentterge qajetti dıagnostıkalyq tekserýler men manıpýlıatsııalar júrgizildi: zerthanalyq zertteýler, kompıýterlik tomografııa, ýltradybystyq, rentgenografııa. Medıtsınalyq kómek kórsetý úshin barlyq beıindi qyzmetter (neırohırýrgter, travmatologtar, hırýrgtar, terapevtter, toksıkologtar, reanımatologtar, psıhologtar, fýnktsıonaldy dıagnostıka mamandary) tartyldy. Travmatologııa jáne ortopedııa ǵylymı ortalyǵynyń, neırohırýrgııa ǵylymı ortalyǵynyń respýblıkalyq mamandarymen keńes ótkizildi, qajetti oblystyq mamandar jumyldyryldy. Barlyq patsıentter medıtsınalyq kómekti tolyq kólemde alýda”, - dep málimdedi Qaraǵandy oblysynyń densaýlyq saqtaý basqarmasynan.
