Qaraǵandy oblysynda avtobýs pen kólik soqtyǵysyp, 5 adam qaza tapty
QARAǴANDY. KAZINFORM — «Almaty-Ekaterınbýrg» tasjolynda iri jol apaty boldy.
14 shilde kúndizgi saǵat 12.00 shamasynda Aqshataý kentinen 30 shaqyrym jerde «Almaty-Ekaterınbýrg» tasjolynda Qaraǵandy qalasyna bara jatqan avtobýs pen «Toıota Estıma» kóligi soqtyǵysqan.
Saldarynan «Toıota Estıma» avtokóliginiń 4 jolaýshysy jáne avtobýstyń bir jolaýshysy oqıǵa ornynda qaıtys boldy.
11 adam ártúrli dene jaraqatymen aýrýhanaǵa jetkizildi.
Atalǵan derek boıynsha qylmystyq is qozǵalyp, tıisti saraptamalar taǵaıyndaldy. Tergeý amaldary júrgizilip jatyr.
Qaraǵandy oblysynyń polıtsııa departamenti júrgizýshilerden jol júrý erejesin qatań saqtap, jyldamdyqty shekten tys asyrmaýdy suraıdy.
