Qaraǵandynyń zoobaǵy sırek kezdesetin janýarlarmen tolyǵýda
QARAǴANDY. QazAqparat - Qaraǵandy memlekettik zoobaǵy sırek kezdesetin janýarlar men qustarmen tolyqty, dep habarlaıdy QazAqparat tilshisi.
Bıylǵy jyly Qaraǵandy haıýanattar baǵy «Jyly júrek - jomart qol» aktsııasyn jalǵastyrýda. Bul is-shara bıznes-qurylymdardyń nazaryn haıýanattar baǵyna aýdarýǵa baǵyttalǵan.
Osylaısha mekeme basshylyǵy demeýshilerdiń qarajat esebinen janýarlar kollektsııasyn tolyqtyrǵysy keledi. Nátıjesinde, qaraǵandylyqtarǵa sońǵy bir jyl ishinde Almaty haıýanattar parkinen Amýr jolbarysy, Rostıslav Shılo atyndaǵy Novosibir haıýanattar baǵynan Qara kanadalyq qasqyr jáne jeke kásipkerden Falabella ergejeıli ponı syıǵa tartyldy.
«Bul janýarlar tabıǵatta sırek kezdesedi. Mysaly, kanadalyq qara qasqyr kúshiktegende qarapaıym kókbóriler sekildi 6-7 kúshiktiń ornyna nebári 3-4 kúshik taba. Al, Amýr jolbarysy popýlıatsııasynyń artqanyn qalaımyz. Bul jyrtqyshtardyń sany 40-shy jyldary álem boıynsha nebári 40 dana boldy. Búgingi kúni janýarlardy qorǵaý jónindegi barlyq baǵdarlamalardyń arqasynda olardyń sany 500 danadan asady. Bul turǵyda mundaı janýarlar óte qajet, - deıdi Qaraǵandy haıýanattar baǵynyń bıology Erbol Baıjanov.
Qaraǵandy haıýanattar baǵynyń janýarlar men qustar toptamasyn qala turǵyndary da tolyqtyrýda. Jaqynda olar súıikti haıýanattar baǵyna eki sándik qoıan, tórt qyzyl tasbaqa, bir tyrna men tórt kúrke taýyq syılaǵan.
Sondaı-aq qaraǵandylyq zoologtar tól alý jáne gendik qordy jańartý boıynsha jumys atqarýda. Osyǵan baılanysty haıýanattar baǵynda janýarlardyń juptaryn qurý úshin ádister qolǵa alynýda.
«Satyp alynǵan nemese syıǵa tartylǵan barlyq janýarlar mindetti karantınnen ótedi. Úsh aı ishinde olar oqshaýlanyp, kútim jasalady. Sebebi barlyq qustar men janýarlar tolyqtaı saý kelmeıdi. Karantınnen keıin janýarlardyń bir-birine beıimdelýi kezeń-kezeńmen júrgiziledi», - dep túsindirdi ornıtologııa bóliminiń basshysy Záýresh Sherembaeva.
Aıta keteıik, Qaraǵandy memlekettik zoologııalyq baǵy elimizdiń úsh iri haıýanattar baǵynyń biri bolyp tabylady. Ol 1938 jyly qurylǵan. Haıýanattar baǵynda janýarlar, qustar men balyqtardyń 209 túri jáne 1568 danasy bar.
