Qaraǵandynyń jas fýtbolshylary Qazaqstan chempıony atandy
QARAǴANDY. QazAqparat - Oblystyq «Jastar» olımpıadalyq rezerv sport mektebiniń tárbıelenýshileri fýtboldan Qazaqstan chempıony atandy. Mundaı nátıjege kóp jyldan beri qol jetkizilmegen edi. Buǵan deıin qurama tek respýblıkalyq birinshilikterdiń júldegerleri atanǵan bolatyn, dep habarlaıdy QazAqparat tilshisi.
Oblystyq Dene shynyqtyrý jáne sport basqarmasynda jas fýtbolshylardy jetistikterimen quttyqtady. Sportshylar men jattyqtyrýshylarǵa alǵys hattar tabys etildi.
«Fýtboldan jasóspirimder arasyndaǵy Qazaqstan chempıonaty Shymkentte 10-19 maýsym aralyǵynda ótti. Birinshilikke elimizdiń 14 aımaǵynan 2007 jyly týǵan 288 fýtbolshydan quralǵan 16 komanda qatysty. Bizdiń oıynshylarymyz qarqyndy túrde jattyqty», - deıdi «Jastar» sport mektebiniń basshysy Balǵabaı Nurlanov.
Ekinshi oryndy Almaty quramasy, al úshinshi oryndy Taraz quramasy ıelendi.
«Jeńiske jetý óte qıyn boldy, barlyq oıyndar kúrdeli ótti. Óz tobymyzda ekinshi oryndy ıelendik. Biraq jartylaı fınalǵa ótip, Tarazdan kelgen komandany jeńdik. Al fınalda penaltıden almatylyqtardy jeńdik. Bizdiń komanda barlyq synaqtardan óte aldy. Biraq eshkim de qalys qalǵan joq, barlyǵymyz jeńiske umtyldyq. Chempıon atanǵanymyzǵa óte qýanyshtymyz», - dep atap ótti komanda jattyqtyrýshysy Vıtalıı Karelın.
Onyń aıtýynsha, tabysqa jetýge turaqty eńbek, jattyǵý, tártip jáne qıyndyqtardy jeńýge umtylys kómektesedi. Ótken jyly «Jastar» mektebiniń tárbıelenýshileri «Lokobol - RTJ 2018» halyqaralyq týrnırinde úzdik atandy.
