Qaraǵandynyń úzdik memqyzmetshileri anyqtaldy

QARAǴANDY. QazAqparat - Qaraǵandyda «Úzdik memlekettik qyzmetshi» respýblıkalyq baıqaýynyń oblystyq kezeńi ótti, dep habarlaıdy QazAqparat tilshisi.

Bul kásibı baıqaý elimizde úshinshi ret ótkizilip otyr. Onyń basty maqsaty-memlekettik qyzmettiń bedelin arttyrý, memlekettik basqarýdyń ozyq tájirıbesin taratý, úzdik qyzmetkerlerdi kótermeleý bolyp tabylady.

Bıyl óńirde baıqaýǵa qatysýǵa 16 adam ótinish berdi.

«Nátıjesinde 13 qatysýshy test tapsyrdy. Onyń nátıjesi boıynsha 7 adam tańdaldy. Qorytyndy kezeńde qatysýshylar jeke jobalardy qorǵaıdy», - deıdi Memlekettik qyzmet basqarmasynyń basshysy Ásel Bilálova.

Qatysýshylardyń jasy men jumys ótili ár túrli boldy. Mysaly, Erlan Tólepov memlekettik qyzmette 19 jyl jumys istep keledi.

«Men osyndaı baıqaýǵa alǵash ret qatystym. Ol memlekettik qyzmettiń ımıdjin arttyrýǵa baǵyttalǵan jáne biz úshin úlken yntalandyrý bolyp tabylady. Barlyǵymyz úshin bul úlken syn, óz quzyrettiligi men daǵdylaryn tekserýge jaqsy múmkindik. Meniń jobam «sýbsıdııalaý qarajatyn paıdalaný tıimdiligin arttyrý» dep atalady. Bul óte ózekti taqyryp», - deıdi baıqaýǵa qatysýshy, Qaraǵandy oblysy boıynsha Qazynashylyq departamentiniń basshysy Erlan Tólepov.

Baıqaýdyń oblystyq kezeńi birneshe týrdan quraldy. Birinshisinde yntalandyrý essesin jazý kerek bolsa, ekinshisiinde - baǵdarlamalyq qujattardy bilý boıynsha testiden ótý, úshinshisi - derbes jobany daıyndaý jáne qorǵaý.

«Meniń eńbek ótilim 3 jyl. Baıqaýǵa qatysýǵa sheshim qabyldadym, sebebi óz kásibı deńgeıimdi kótergim keledi, tájirıbe men qosymsha bilim jınaǵym keledi», - deıdi Qarqaraly aýdanynyń qatysýshysy Nurjan Qoshqynbaı.

Ótkizilgen áńgimelesýdiń qorytyndysy boıynsha óńirlik komıssııa baıqaýdyń respýblıkalyq kezeńine qatysýǵa usynylatyn úmitkerlerdi anyqtady. Jeńimpazdar «QR Úzdik memlekettik qyzmetshisi» tósbelgilerimen marapattalady.