Qaraǵandynyń «úzdik akteri» Qytaıda es-tússiz jatyr
QARAǴANDY. QazAqparat - Kezekti eńbek demalysymen Qytaıǵa ketken Temirtaý jas kórermender teatrynyń akteri, óńirlik «Jyl akteri» syılyǵynyń laýreaty Alekseı Shýmskıı komada jatyr, dep habarlaıdy «QazAqparat» HAA tilshisi.
«Alekseı Shýmskııdiń nelikten komaǵa túskeni, ony Qytaıda qalaı emdep jatqany týraly esh derek joq. Ókinishke oraı, Alekseı medıtsınalyq saqtandyrýdy rásimdemegen. Sol sebepti Qytaı dárigerleri ony tegin emdeýden bas tartqan», - deıdi teatr dırektory Vladımır Drozdetskıı.
Juma kúni, 28 shildede ártis Qazaqstanǵa jetkiziledi.
«Ony qazaqstandyq klınıkaǵa kóshirý máselesi sheshildi. Erteń eki el arasyndaǵy shekarada Zaısan dárigerleri kútip alady. Eger dárigerler ruqsat berse, Alekseıdi Qaraǵandyǵa alyp ketedi. Bolmaıdy dese, emdeý jumystary Shyǵys Qazaqstan oblysynyń Zaısan aýdanynda jalǵasady», - deıdi teatr dırektory.
Akter Qytaıǵa bara jatqanda-aq, ózin jaısyz sezingen. Biraq saparyn úzbeı, shekarany kesip ótken.
«Alekseı eshqashan naýqastanyp, demalys alyp kórmegen. Densaýlyǵynda esh kinárat joq edi», - deıdi Vladımır Drozdetskıı. - Áriptesimizdi tasymaldaý máselesin sheshýde kómek kórsetken Qaraǵandy oblysynyń mádenıet basqarmasyna jáne ShQO ókiletti uıymdaryna úlken alǵys aıtamyn».
Bıyl Alekseı Shýmskıı «Jyldyń úzdik akteri» atanǵan jáne Qaraǵandy oblysy ákiminiń qolynan arnaıy aqshalaı syılyqty alǵan.
