Qaraǵandynyń týmasy sms habarlama úshin Mınskide ustaldy
ASTANA. QazAqparat - Mınskide jarty kún boıy jolaýshylar qalalyq metroǵa kirgizilmedi. Mılıtsııa bunyń sebebin túsindirdi. Oǵan jer asty jolyn jarý josparlanǵany jaıly sms habarlama sebep bolǵan eken, dep habarlady «Vchernıı Grodno».
Belorýs Respýblıkasynyń ІІM jáne MQK saıttarynda habarlanǵandaı, stýdent qyz metrodaǵy jolaýshylardyń biriniń jarylǵysh zatty iske qosqaly jatqany jaıly sms habarlamany terip jatqanyn baıqap qalǵan. Alańdaýshylyq bildirgen qyz metronyń «Oktıabrskaıa» stansasyndaǵy mılıtsıonerge aıtyp bergen. Elordanyń qaýipsizdik qyzmetiniń qyzmetkerleri mılıtsıonerlermen birge zamanaýı tehnıkalyq quraldar kómegimen jolaýshynyń jeke basyn anyqtap, ony qamaýǵa aldy. Ol Mınsk oblysynda turatyn Qaraǵandy oblysynyń 35 jastaǵy týmasy bolyp shyqty. Qazirgi ýaqytta qajetti tergeý áreketteri júrgizilýde.
