Qaraǵandynyń tártip saqshylary eki jalǵan polıtseıdi qolǵa túsirdi
QARAǴANDY. QazAqparat – Eki jalǵan polıtseı Shahtınsk qalasynyń turǵynynan esirtki zattaryn zańsyz saqtaǵany úshin qylmystyq jaýapkershilikten bosatyp beremiz dep 1000 dollar talap etken, dep habarlaıdy QazAqparat tilshisi.
21 qańtarda Qaraǵandy oblysy polıtsııa departamentiniń Ózindik qaýipsizdik basqarmasyna Shahtınsk qalasynyń 36 jastaǵy turǵyny eki polıtsııa qyzmetkeri qylmystyq jaýapkershilikten bosatyp beretinin jáne sol úshin 1000 AQSh dollary kóleminde aqshalaı qarajat talap etkendigi týraly ótinish kelip túsken.
Atalǵan fakti boıynsha 2020 jyldyń 27 qańtarynda Shahtınsk qalasynda Qaraǵandy oblysy PD Ózindik qaýipsizdik basqarmasynyń qyzmetkerleri tergeý is-áreketterin júrgizý barysynda esirtki quraldaryn zańsyz saqtaý faktisi boıynsha qylmystyq jaýapkershilikten jaltarǵany úshin aryzdanýshydan talap etilgen somanyń bir bóligin, ıaǵnı 100 000 teńge kóleminde qarajatty alǵan bette 22 jáne 24 jastaǵy eki jergilikti turǵyndy ustady. Olar ótinish berýshige ózderin polıtsııa qyzmetkerlerimiz dep tanystyrǵan.
«Tekserý barysynda ustalǵandardan olardyń biriniń atyna jazylǵan ishki ister basqarmasy qyzmetkeriniń qyzmettik kýáligine uqsas qujat tabyldy jáne tárkilendi. Degenmen, naqty ustalǵandar Oblystyń ishki ister organdaryna eshqandaı qatysy joq jáne jumyssyz bolǵan»,-dep habarlady Qaraǵandy oblysy PD baspasóz qyzmeti.
Qazirgi tańda oblystyq PD ÓQB osy fakti boıynsha sotqa deıingi tergeý júrgizýde, onyń nátıjesi boıynsha tıisti protsessýaldyq sheshim qabyldanatyn bolady.
