Qaraǵandynyń ortalyq saıabaǵyndaǵy kóldiń jaǵasynda óli balyqtar tabyldy
QARAǴANDY. QazAqparat – Qaraǵandy qalasynyń Ortalyq mádenıet jáne demalys saıabaǵyndaǵy kóldiń jaǵalaýyndaǵy óli balyqtarǵa qatysty Mádenıet jáne demalys saıabaqtary men gúlzarlar basqarmasynyń mamandary túsinikteme berdi, dep habarlaıdy QazAqparat tilshisi.
Qaraǵandydaǵy Ortalyq mádenıet jáne demalys saıabaǵyndaǵy kóldiń jaǵalaýynda óli balyqtar tabyldy. Turǵyndar bul jaǵdaıǵa alańdaýshylyq bildirip jatyr. Mamandar bolsa kólde eshqandaı ekologııalyq qaýip joq dep málim etti.
«Bul tabıǵı qubylys ekenin túsindire ketkim keledi. Sebebi jappaı qyrylýdy biz baıqap otyrǵan joqpyz. Al ázirge jekelegen jaǵdaı oryn alýda jáne bul qystan keıin barlyq kólderge tán nárse», - dep túsindirdi Mádenıet, demalys saıabaqtary jáne gúlzarlar basqarmasynyń bastyǵy Talǵat Smaıylov.
Sonymen qatar, qaraǵandylyqtar sońǵy jyldary Ortalyq saıabaqtaǵy kóldiń durys kútilmegenine shaǵymdanady.
«Búgingi tańda kóldi Buqpa ózeninen keletin sýmen toltyryp jatyrmyz. Sondaı-aq, muzdyń erýine qaraı kúndelikti qoqys jınalady», - dep túsindirdi Mádenıet, demalys saıabaqtary jáne gúlzarlar basqarmasynda.
