Qaraǵandynyń ortalyq saıabaǵynda úıeńki men jóke aǵashtary otyrǵyzyldy
QARAǴANDY. QazAqparat - Qaraǵandy qalasynyń Ortalyq mádenıet jáne demalys saıabaǵynyń jaǵalaýynda 150 kóshet otyrǵyzyldy. Olarǵa saıabaqtar men gúl baqtary basqarmasynyń qyzmetkerleri kútim jasaıtyn bolady, dep habarlaıdy QazAqparat tilshisi.
Jasyl jelekter aptasyna eki ret sýarylyp, tyńaıtqyshtarmen qorektendiriletin bolady. Búgingi aǵash otyrǵyzý naýqanyna 70 adam qatysty.
«Tender arqyly otyrǵyzý materıaldaryn jergilikti aǵash ósirýshilerden satyp aldyq. Otyrǵyzý kezinde kóshetter biraz jersinedi, sondyqtan olardyń eń álsizderi jańa orynda óspeı qalýy múmkin. Otyrǵyzylǵan aǵashtardyń jalpy sanynan ádette 10%-ǵa jýyǵy qýrap qalady. Bul qalypty kórsetkish. Biz olardy kelesi otyrǵyzýlar kezinde jańa kóshetterge aýystyramyz», - dep túsindirdi Qaraǵandy ákimdiginiń «Mádenıet, demalys saıabaqtary men gúlzarlary basqarmasy» KMK bas ınjeneri Talǵat Smaıylov.
Osy jyly saıabaqtar men gúlzarlarda qylqan japyraqty jáne japyraqty eki myń aǵash otyrǵyzý josparlanýda. Olardyń arasynda qaraǵaı, qaıyń, shaǵan, jóke jáne moıyl aǵashtary bar.
