Qaraǵandynyń mýzkomedııa teatry maýsymdy jańa premeramen aıaqtaıdy
Bul spektakl úshinshi ǵasyr qatarynan álemniń barlyq derlik teatrynyń sahnasynda kórermenniń kóńilinen shyǵyp kele jatqan týyndy.
Qaraǵandylyqtar úshin Volfgang-Amadeı Motsarttyń mýzykalyq komedııa pesasyn rejısser Evgenııa Permıakova qoıdy. Onyń ıdeıasy boıynsha, oqıǵa Amerıkada 30-shy jyldary, Uly Depressııanyń basynda ótedi.
«Meniń qoıylymym – kórermen eshqashan kóre almaıtyn sahnanyń bir túri. Spektakldiń ózi, daıyndyqtar, akterlerdiń bir-birimen jáne rejıssermen qarym-qatynasy, básekelestik, mahabbat. Munyń bári ár teatrda bar dúnıe. Biraq spektakldi qurý protsesi biz kórip otyrǵan týyndydan túbegeıli erekshelenedi», – deıdi Evgenııa Permıakova.
Mýzkomedııa teatry ádettegideı, Reseı Federatsııasynyń teatr qaıratkerlerimen tyǵyz jumys isteıdi. Eki maman Sankt-Peterbýrgten keldi. Bul – dırıjer Valentın Bogdanov jáne stsenografııa men kostıýmderge jaýapty Kırıll Pıskýnov. Balette bı elementterin qoıýshy Kalınıngradtan kelgen Oksana Holeva boldy.
«Jumysqa kirisý qorqynyshty boldy, biraq sonysymen de qyzyqty ótti. Alǵashynda Motsarttyń tapqyr mýzykasyn HH ǵasyrdyń 30-shy jyldarynyń horeografııasyna qalaı aýystyrý kerektigi túsiniksiz boldy. Sebebi, ol tango, charleston, fokstrot sekildi bıler. Mýzyka opera men vokalǵa jazylǵan, olar bı bıleýge arnalmaǵan. Mine, qıyny osynda boldy. Belgili bir yrǵaq pen qarqyn joq, oılap tabýǵa, biriktirýge, jazýǵa týra keldi. Ne bolǵanyn kórermender baǵalaıdy endi. Biraq meniń oıymsha, biz Motsartty jandandyrdyq», – dep bólisti Oksana Holeva.
Rejısserdiń aıtýynsha, spektakl 30-shy jyldardaǵy Amerıkanyń stılıstıkasy esebinen jasóspirimder úshin de, Motsartty orıgınal túrinde tyńdaı alatyn klassıkalyq mýzyka áýesqoılary úshin de qyzyqty bolady.
Sıýjet boıynsha teatr dırektory Frank trýppasyna ánshiler men akterlerdi jınaıdy. Biraq menmendiksiz akter bola ma? Ár adam erekshelenip, eń jaqsy ekenin, juldyz ekenin kórsetýi kerek. Qandaı sezim basymyraq túsedi – ataqqumarlyq pen paıdakúnemdik pe, álde ónerge degen mahabbat pa?
Aıta keteıik, teatr Ashyq qosymshasy boıynsha jumys isteıdi.
