Qaraǵandynyń medıtsına mekemeleri TJ kezinde qalaı jumys isteıdi

QARAǴANDY. QazAqparat - Qaraǵandy oblysy lensaýlyq saqtaý basqarmasynyń basshysy Erjan Nurlybaev medıtsına mekemeleriniń jumysyna TJ rejımi qalaı áser etetini jáne aımaq turǵyndaryna vırýs juqtyrmaý úshin ne isteý kerektigi týraly baıandady, dep habarlaıdy QazAqparat tilshisi.

Emhanalar qalaı jumys isteıdi?

Emhanalar burynǵy rejımde jumys isteıdi. Eger ótinishter tym kóp bolsa, dárigerler demalyssyz qabyldaı bastaıdy. Statsıonarlarda naýqastarmen kezdesýge ýaqytsha shekteý qoıyldy. Qart adamdarǵa emhanaǵa barýdan ýaqytsha bas tartý usynylady. Dárigerler olarǵa úıge kelip, tıisti dári-dármegin páterine jetkizip beredi.

Aýrýhanalarda dári-dármek jetkilikti me?

Iá. Qazir oblystyq densaýlyq saqtaý basqarmasy aldaǵy eki aıǵa qajetti dári-dármekti satyp alýda.

Eger mende JRVI belgileri bolsa, emhanaǵa barý kerek pe?

Joq. JRVI belgileri kezinde dárigerdi úıge shaqyrǵan jón.

Otbasy múshesi aýyryp qaldy. Maǵan ne isteý kerek?

Birinshi kezekte naýqas betperde kııýi tıis. Múmkindiginshe ol úshin «úı karantınin» uıymdastyrý kerek - ony jeke bólmege ornalastyrý jáne oǵan otbasynyń basqa múshelerine kirýin shekteý qajet. Sodan keıin dárigerdi shaqyrý kerek.

Qandaı da bir erekshe preparattardy satyp alý kerek pe?

Joq. Úıdegi dári qobdıshasynda gradýsnık, birneshe medıtsınalyq maskalar, ystyq túsiretin jáne vırýsqa qarsy dáriler bolýy kerek.

Denim saý bolsa, maska kııý kerek pe?

Joq. Maskany tek aýrý adamdarǵa kııýge keńes beriledi. Degenmen, úıdegi dári qobdıshasynda birneshe medıtsınalyq maska bolǵany abzal.

Medıtsınalyq maskany qaıda satyp alamyn?

«Bıosfera» dárihanalarynyń jelisi otandyq óndiristiń 300 myń maskasyn satyp aldy. Olar kóterme baǵamen satylady. Sondaı-aq emhanalar janyndaǵy áleýmettik dárihanalarda maska bar.

Eger juqtyrǵandar kóp bolsa, olardy oqshaýlaı ala ma?

Iá. Óńirdiń iri kásiporyndary ózderine tıesili qala syrtyndaǵy sanatorııler men profılaktorıılerde qajet bolǵan jaǵdaıda karantın uıymdastyrylatynyna kelisim berdi. Qaraǵandy oblysynda naýqastardy tasymaldaýǵa arnalǵan eki arnaıy kapsýla bar.

Qazir karantınde qansha qaraǵandylyq bar?

Qaraǵandy oblysynda 34 adam karantınde. Olardyń eshqaısysynda aýrýdyń belgileri joq.

Qaraǵandy oblysynda koronavırýs juqtyrǵandar bar ma?

Joq. Qaraǵandy oblysynda COVID-19 vırýsymen aýyrǵandar tirkelgen joq.