Qaraǵandynyń qoǵamdyq kólikterinde elektrondy bılet júıesi iske qosyldy
QARAǴANDY. QazAqparat - Qaraǵandyda alǵashqy valıdatorlar №118 baǵdardaǵy avtobýstarǵa ornatyldy, dep habarlaıdy QazAqparat.
Elektrondyq bıletteý júıesi qazirgi tańda testilik rejimde jumys istep jatyr. 2019 jylǵy qańtardan bastap ony barlyq jolaýshy tasymaldaý qoǵamdyq kólikterinde ornatý josparlanyp otyr, delingen oblystyq ákimdik saıtynda.
«Qazir №118 avtobýstarda bir termınaldan ornatyldy, júrgizýshige planshet berildi. Taǵy shamamen 200 termınal kedendik rásimdeýden ótip jatyr, sebebi olardy Koreıadan jetkizedi. 2019 jyldyń qastarynda termınaldardy barlyq marshrýttarǵa ornatý bastalady. Ol jumystar úsh aı ýaqytty qajet etedi», - dedi qala ákimdiginiń jolaýshy tasymaldaý kóligi sektorynyń meńgerýshisi Eskendir Qıbıdolla.
Onyń aıtýynsha, elektrondyq tólem kartalary ázirge qalalyq ákimdik qyzmetkerlerine berilgen, al olardy jappaı satý kelesi jyldan bastalady.
«Elektrondy kartalar barlyq jerlerde, dúńgirshekter men dúkenderde satylatyn bolady. Olardy toltyrýǵa qatysty esh qıyndyq bolmaıdy», - dedi Eskendir Qıbıdolla.
Qaraǵandyda 600-ge jýyq avtobýs jolaýshy tasymaldaıdy. Qalada elektrondy bılet júıesi jeke ınvestordyń esebinen engizilip jatyr.
