Qaraǵandynyń qala men aýyl ákimderi saılaýǵa túsedi
ASTANA. QazAqparat - Aǵymdaǵy jyldyń 8-9-shy tamyzda Qaraǵandy oblysynyń aýdandyq mańyzdaǵy qalalar, aýyldyq okrýgter, kentter men aýyldardyń ákimderi saılanady, dep habarlaıdy ákimniń resmı saıty.
129 orynǵa barlyǵy 391 úmitker tirkelgen.
«8-shi tamyzda aýyldyq okrýg turǵyndary daýys berse, 9-shy tamyzda qala turǵyndary ákimderin saılaıdy. Qaraǵandy oblysynda ákimder 202 eldi mekende saılanatyn bolady. Alaıda bıylǵy jyly saılaý 129 okrýgte ótedi. Bul 2014-shi jyldan beri qaıta saılaý júrgizilmegen eldi mekender», - dep málimedi Qaraǵandy oblystyq saılaý komıssııasynyń hatshysy Natalıa Batalova.
Turǵyndarǵa úmitkerlerdi aýdan ákimderi jergilikti halyqpen ótetin jınalys barysynda tanystyrýlary tıis. Ákim laýazymyna úmitkerler jasy 25-ten joǵary Qazaqstan Respýblıkasynyń azamaty, Qazaqstan Respýblıkasy Konstıtýtsııasynyń 33-shi babyna saı belsendi saılaý quqyǵyna ıe, Qazaqstan Respýblıkasynyń «Memlekettik qyzmet týraly» Zańyndaǵy talaptarǵa saı keletin, joǵary bilim bar jáne sáıkes oblys aýmaǵynda turatyn azamattar bola alady.
Búgingi tańda bizdiń oblysymyzda tirkelgen jáne saılaý aldyndaǵy nasıhat júrgizýdi bastap ketken úmirtkerler sany 391. Bul ortasha eseppen alǵanda bir orynǵa 3 adam degendi bildiredi. Jergilikti bıýdjetten ár úmitkerge 66500 teńgeden bólingen. Bul somaǵa nasıhat jumystary, kólik shyǵyndary jáne BAQ jarııalanymdary kiredi.
Saılaý 8-shi tamyzda 120 aýyldyq aýdandarda jáne 9-shy tamyzda 9 aýdandyq mańyzy bar qalalarda ótedi.
