Qaraǵandynyń eń ádemi arýy anyqtaldy
QARAǴANDY. QazAqparat - Abylaı han atyndaǵy Almaty halyqaralyq qatynastar jáne álem tilderi ýnıversıtetiniń ekinshi kýrs stýdenti Ekaterına Dvoretskaıa «Qaraǵandy arýy 2017» atandy, dep habarlaıdy «QazAqparat» HAA tilshisi.
Qazylar alqasy 20 qatysýshynyń arasynan aqyly men kórki kelisken arý retinde 19 jastaǵy qaraǵandylyq Ekaterına Dvoretskaıany tanydy.
Baıqaý uıymdastyrýshysy - «Art line» modeldik agenttigi.
Qatysýshylar áleýmettik jeli arqyly izdestirildi. Instagramda #hochýstatmısskaraganda2017 heshtegimen baıqaý jarııalandy. Qyzdar kıim úlgilerin kórsetip, fotokamera aldynda jumys isteı bilý qabiletterin, bilimderin pash etti. Fınalda baq talastyrǵan arýlar keshki kóılektermen, qymbat ishiktermen sahnaǵa shyǵyp, horeografııalyq talanttaryn kórsetti. Ádil qazylar alqasynyń quramynda 2004 jylǵy Jazǵy olımpıada oıyndarynyń qola júldegeri Dmıtrıı Karpov, «X Factor» mýzykalyq jobasynyń jeńimpazy Abdýlkárim Karımov, «Qazaqstan arýy» baıqaýynyń prezıdenti Alena Rıvlına-Qyrbasova, fotograf Alekseı Baranov, «Qazaqstan arýy 2015» jeńimpazy Renata Nurǵazına boldy. Qazylar alqasynyń tóraǵasy Almaty qalasy jastar saıasatyn damytý memlekettik qorynyń dırektory Sovet Seıitov boldy.
Sán baıqaýynyń nátıjesinde Nadejda Holostıakova «Kórermen kózaıymy» atalymynda jeńimpaz boldy. Úshinshi vıtse-mıss - Dıana Rýstambekova, ekinshi vıtse-mıss - Krıstına Gýseva, birinshi vıtse-mıss - Mahabbat Túktibaeva.
Jeńimpaz atanǵan Ekaterına Dvoretskaıa baıqaý táji men 500 myń teńge aqshalaı syılyqqa ıe boldy.
