Qaraǵandynyń eki kolledji WorldSkills standarttary boıynsha bilim beredi

QARAǴANDY. QazAqparat – Qaraǵandy temirjol jáne taý-ken ındýstrıaldyq kolledjderinde «Jas maman» jobasy boıynsha quzyrettilik ortalyqtary ashyldy.

Stýdentter munda eńbek naryǵynda suranysqa ıe mamandyqtar boıynsha tájirıbelik daǵdylardy ıgerip, sheberlikterin shyńdaı alady, dep habarlaıdy QazAqparat tilshisi.

Temirjol kolledjinde temirjol salasynyń segiz mamandyǵy boıynsha toǵyz zerthana, eki sheberhana, bir oqý kabıneti men trenıng jáne koýchıng ortalyǵy jabdyqtalǵan.

Qaraǵandy taý-ken ındýstrıaldyq kolledjinde «Taý-ken isi» jáne «Dánekerleý tehnologııalary» boıynsha oqý kabınetteri, zerthanalar men sheberhanalar tolyq jabdyqtalǵan.

«Jabdyqtardyń tizimi WorldSkills standarttaryn eskere otyryp jáne Kásipkerler Palatasynyń, sondaı-aq jumys berýshilerdiń usynystary negizinde qalyptastyryldy. Jyl sońyna deıin óńirde taǵy bes quzyrettilik ortalyǵyn ashý josparlanýda», – dep habarlady Qaraǵandy oblysynyń bilim basqarmasy.

Esterińizge sala keteıik, «Jas maman» jobasy Elbasy Nursultan Nazarbaevtyń bastamasymen iske qosyldy. Ol búkil el boıynsha kolledjder men joǵary oqý oryndaryn jańǵyrtýǵa baǵyttalǵan.

«Jas maman» jobasy bilim alýshylardyń biregeı kásibı biligin damytýǵa jáne qazaqstandyq qana emes, halyqaralyq naryqta da ózekti, suranysqa ıe ındýstrııalyq jáne servıstik mamandyqtar boıynsha mamandar daıarlaýǵa múmkindik beredi.