Qaraǵandynyń barlyq mektepterinde órt qaýipsizdigi tekserilýde
QARAǴANDY. QazAqparat - Qaraǵandy mektepteriniń birinde bolǵan órtten keıin oblystyń barlyq orta bilim berý mekemelerinde jappaı tekseris jumystary bastaldy, dep habarlaıdy QazAqparat tilshisi.
Qaraǵandy oblysy Bilim basqarmasynyń baspasóz qyzmetinen málim etkendeı, órt qaýipsizdigimen baılanysty máselelerdi ýaqytyly anyqtaý úshin óńirde jappaı tekserister júrýde.
Barlyq mektepterde órt qaýipsizdigi men elektrmen jabdyqtaý talaptarynyń saqtalýynyń sapasy tekseriledi.
Aıta ketý kerek, 12 qyrkúıek kúni Qaraǵandy qalasyndaǵy №36 orta mektep órtengen bolatyn. Tilsiz jaý 300 sharshy metr aýmaqty sharpydy. Onda shatyrdy jóndeý jumystary áli jalǵasýda. Degenmen, oqýshylardyń sabaqtary 17 qyrkúıekte qaıta jalǵasty.
