Qaraǵandynyń balalar úıinde sport zaly jabdyqtaldy

QARAǴANDY. QazAqparat – Qaraǵandynyń «Tańsholpan» balalar úıi tárbıelenýshileriniń sporttyq jetistikterimen tanymal. Jergilikti chempıon fýtbolshylar men veloshabandozdar birneshe jyl buryn Eýropa elderinde bolǵan. Endi boks pen kúres áýesqoılary óz sheberligin shyńdaı alady, dep habarlaıdy QazAqparat tilshisi.

Sporttyq qural-jabdyqtardy balalar úıine «Batyr bolamyn» qaıyrymdylyq qory syıǵa tartty.

«Bizge bokspen jáne kúrespen aınalysý úshin qajettiniń barlyǵyn syıǵa tartty: mattar, boks tulyby men qolǵaptar, shlemder, sporttyq snarıadtar. Osynyń arqasynda biz jattyǵý zalyn qaıta beıindedik. Endi balalardyń sportpen aınalysýyna kóbirek múmkindikter bar. Árıne, biz qýanyshtymyz. Bul balalarymyz úshin keremet syılyq. Bizde sport jaqsy damyǵan. Al qazir pandemııaǵa baılanysty barlyq negizgi ómir balalar úıiniń qabyrǵasynda ótip jatyr», – deıdi «Tańsholpan» balalar úıi dırektorynyń orynbasary Gúlmıra Maıkambeva.

«Batyr bolamyn» qaıyrymdylyq qorynyń mıssııasy – salaýatty ómir saltyn nasıhattaý jáne sport arqyly jańa býyndy tárbıeleý.

«Tańsholpan» tárbıelenýshileri - sporttyń ár túrinen qalalyq, oblystyq jáne respýblıkalyq jarystardyń birneshe dúrkin jeńimpazdary men júldegerleri.

Balalar úıiniń komandalary fýtboldan, velosporttan jáne ústel tennısinen Qazaqstan chempıony atandy.