Qaraǵandynyń alty turǵyny bıznesmenderden aqsha bopsalaǵan
QARAǴANDY. QazAqparat - Qaraǵandynyń alty turǵyny bıznesmender men kásiporyndardyń biriniń ókilinen aqsha bopsalady degen aıyppen sot aldyna bardy, dep habarlaıdy QazAqparat.
Qylmystyq is materıaldaryna sáıkes, bir top er adam kásipkerlerdiń aqshasy men avtokólikterin kúshpen tartyp alyp otyrǵan, olardy zańsyz bas bostandyqtarynan aıyryp, alaıaqtyqpen aınalysqan.
Atap aıtqanda, qylmystyq top músheleriniń biri kásipkerge qońyraý shalyp ózi talap etken mol kólemdegi qarjyny bermese, uryp-soǵyp, bolmasa bıznesiniń júrýine kedergi keltiretinin aıtyp, qorqytqan. Sonymen birge, ol ózin Kókshetaýdaǵy uıymdasqan qylmystyq toptyń múshesimin dep tanystyrǵan. Alaıda, kásipker mundaı «qamqorlyqqa» muqtaj bolǵan joq jáne bul oqıǵany jergilikti turǵynǵa aıtqan. Jergilikti turǵyn tergeýshilerge qońyraý soqqan. Tergeý nusqasy boıynsha, kúdikti kásipkerdi jaqsy tanıtyndaı túr tanytqan jáne qylmys áleminde baılanysy zor «bedeldi» adamdardyń biri ekenin aıtyp, iri kólemdegi aqshany tezirek jetkizýge keńes bergen. Kúdikti kásipkermen birge Qaraǵandynyń shetkeri aımaǵyna aqmolalyq uıymdasqan qylmystyq toptyń jalǵan múshelerimen kezdesýge barǵan. Shyn máninde alty sottalýshy qoldan atys uıymdastyrǵan jáne ılandyrý úshin kásipkerdiń sanyn jaralaǵan.
«Jalǵan atys aıaqtalǵan soń, uıymdasqan qylmystyq top «músheleri» kásipkerden 100 myń dollar ótemaqy suraǵan. Suraǵan aqshany bermegen jaǵdaıda, kásipkerdiń otbasynan kek alamyz dep qorqytqan. Jaraly bıznesmen alaıaqtarǵa 6 mıllıon teńge turatyn «Toıota Kamrı» kóligin bergen jáne baǵaly buıymdaryn lombardqa ótkizgen. Bul oljanyń barlyǵyn sottalýshylar ıemdengen.
Odan bólek, sottalýshylar ózge kásipkerdi zańsyz túrde bas bostandyǵynan aıyryp, jergilikti turǵynnan aqsha alyp, qaıtaryp bergen, al qylmystyq top músheleri qaıtarylǵan qaryzdy taǵy da talap etken. Ózderin qaryz berýshiniń senimdi ókilderimiz dep atalǵan alty sottalýshy aqshanyń tıisti jerge jetpegenin aıtqan. Olar kásipkerdi ózine tıesili «Pejo» kóligimen Qaraǵandynyń ońtústik shyǵys aýdanyna alyp ketken jáne sporttyq keshen aýmaǵynda zańsyz ustaǵan. Sondaı-aq, sottalýshylar kólik ishinen tabylǵan iri kólemdegi aqshany alyp ketken.
Odan bólek, sottalýshylar taǵy bir kásipkerdiń «Mıtsýbısı» avtokóligin tartyp alǵan.
«Sottalýshylarǵa QR Qylmystyq kodeksiniń 194-baby («Aldyn ala uıymdasqan bopsalaý»), 126-baby («Adam bostandyǵyn zańsyz shekteý»), 200-baby («Avtokólikti zańsyz ıemdený») jáne 191-baby («Qaraqshylyq») boıynsha aıyp taǵyldy», - dep habarlady qylmystyq ister boıynsha arnaıy mamandandyrylǵan aýdanaralyq sottyń baspasóz qyzmeti.
Sot tyńdalymy qylmystyq ister boıynsha arnaıy mamandandyrylǵan aýdanaralyq sotta sýdıa Bekzat Shalǵymbaevtyń tóraǵalyǵymen bastaldy. Sottalýshylardyń biri advokatynyń joq ekenin málimdedi. Sýdıa sot tyńdaýyn keıingi qaldyryp, sottalýshyǵa memlekettik qorǵaýshy berý týraly ótinimdi Qaraǵandy oblysynyń advokattar alqasyna jiberdi.
