Qaraǵandynyń 57 jastaǵy turǵyny 15 túrli alaıaqtyq jasaǵan
QARAǴANDY. QazAqparat - Qaraǵandyda 57 jastaǵy er adam 15 túrli alaıaqtyq áreket jasady degen kúdikke ilindi, dep habarlaıdy QazAqparat.
Qaraǵandy oblystyq Іshki ister departamenti ókilderiniń habarlaýynsha, bıylǵy jyldyń 28-shi qyrkúıeginde Qaraǵandy qalalyq ishki ister basqarmasynyń ońtústik-shyǵys bólimine qalanyń 77 jastaǵy turǵyny shaǵym túsirgen. Zeınetker shaǵymynda belgisiz bireýdiń onyń senimine kirip, 2 myń eýrosyn alyp ketkendigin aıtqan.
Jedel-izdestirý jumystarynyń barysynda tártip saqshylary osy qylmysty jasaýy múmkin degen kúdikpen Qaraǵandynyń 57 jastaǵy turǵynyn ustady. Ustalǵan adam óziniń jasaǵan alaıaqtyq áreketin moıyndady, sonymen qatar ol osy sııaqty taǵy 14 áreketke barǵandyǵyn aıtty.
Keıin málim bolǵanyndaı, 57 jastaǵy azamat óziniń kórshileri men tanystary arqyly kózdegen adamy týraly málimetterdi surap, jınastyryp júretin bolǵan. Artynan onyń senimine kirip, «balalaryńyz aqsha berip jiberdi» degen jeleýmen olardyń qolda bar qarjylaryn alyp, olardy jalǵan banknottarǵa aıyrbastap beretin bolǵan.
Alaıaqtyń arbaýyna kóbine shetelde balalary nemese týystary bar egde tartqan ańǵal azamattar ilikken. Atalmysh áreket sotqa deıingi tergeýdiń biryńǵaı tizilimine QR QK-niń 190 babynyń 1 bólimi boıynsha tirkelgen.
Aıta keteıik, osyǵan deıin astanalyq tártip saqshylarynyń 14 velosıped urlady degen kúdikpen Qaraǵandy oblysynyń 22 jastaǵy turǵynyn ustaǵandyǵyn habarlaǵan bolatynbyz.
