Qaraǵandyny jylýmen jabdyqtaý máseleli qalaı sheshilmek
QARAǴANDY. QazAqparat – Qalalyq ákimdikte ótken keńeste Qaraǵandynyń jylýmen qamtamasyz etý máseleleri talqylandy. Kenshiler shaharyn jylytý máselesin sheshý úshin JEO-3-ten úshinshi jylý qubyrynyń qurylysy jáne jylý jelilerin oqshaýlaýǵa qarajat bólý usynylyp otyr, dep habarlaıdy QazAqparat tilshisi.
«Aıazdar bizdiń qalany jylytýdaǵy problemalyq jerlerimizdi kórsetti. Sapasyz jylýmen qamtýǵa shaǵymdar túse bastady. Negizinen Suryptaý, Prıshahtınsk, Maıqudyq jáne Ońtústik-Shyǵys aýdandarynan narazylyqtar kelip tústi. Osy kezeńde berilgen jylytý úshin qaıta esepteý júzege asyrylady. «Teplotranzıt Karaganda« jáne aýdan ákimdikteri bul suraqpen aınalysýda. Bul máseleni biz baqylaýda ustaımyz», - dedi qala basshysy Ermaǵanbet Bólekpaev.
Tutynýshylardyń páterlerine jetkilikti jylý barmaýyna qatysty problemalarynyń biri turǵyn úı, ónerkásiptik kásiporyndar men áleýmettik mádenı-turmystyq nysandardyń aýqymdy qurylysy sebep bolyp otyr.
«Eger 2016 jyly -32°c kezindegi jylýdyń eseptik birligi 116 Gkal/saǵ qurasa, 2020 jyly ol 200-300 Gkal/saǵ. aralyǵynda boldy, tutynýshylardyń qosylǵan júktemesi kezindegi normatıvtik ysyraptardy eskere otyryp, tapshylyq 250 Gkal/saǵ. astam qurady, tapshylyqtyń ósýiniń basty sebepteriniń biri stantsııanyń normatıvtik temperatýralyq kestesiniń saqtalmaýy, sondaı-aq magıstraldyq jeliniń birinshi jáne ekinshi kezeginiń ótkizý qabiletiniń bolmaýy bolyp tabylady. Sonymen qatar, jeltoqsan-qańtar aılarynda JEO-3 №6 týrbınasyn jóndeý jumystary júrgizildi. Nátıjesinde eki qazandyq rezervte boldy», - dedi Kommýnaldyq máseleler jónindegi keńesshi Beket Qosshyǵulov.
Taǵy bir másele - jylý jelilerinde oqshaýlaýdyń bolmaýy.
Jylýmen qamtamasyz etýdi retteý úshin birneshe sheshim usynyldy. Stantsııa temperatýralyq kesteni saqtaýǵa kóshýi, sýdy hımııalyq tazartýdy júzege asyrýy jáne úshinshi jylý shyǵarý jobasyn iske asyrýǵa kirisýi tıis.
Jaqyn arada oblystyq jáne qalalyq ákimdikter «Teplotranzıt Karaganda» JShS qarjylaı qoldaý kórsetetin bolady. Qubyrlardy jylytqysh materıaldarmen oqshaýlaýǵa jáne jóndeýge qarajat bólý josparlanýda. Stantsııanyń múmkindikterine qaraı salynyp jatqan nysandardy jylýmen jabdyqtaý úshin tehnıkalyq sharttardyń berilýin baqylaý kúsheıtiletin bolady.
Budan basqa, «Karaganda Energotsentr» JShS 2021-2025 jyldary bir týrbına (110 MVt) jáne bir qazandyq (180 Gkal/saǵ) salýdy josparlap otyr.
Ermaǵanbet Bólekpaev aýdan ákimderine turǵyn úılerdi jylytý maýsymyna daıyndaýǵa kóbirek kóńil bólýdi tapsyrdy. Kelesi jylytý maýsymynyń bastalýyn kútpeı, búgingi kúni elevator toraptary men jertóle úı-jaılaryn jóndeýdi talap etetin úılerdiń sanyn anyqtaý qajet.
