Qaraǵandyny aınalyp ótý jolynyń qurylysy qarqyndy júrgizilmek
ASTANA. QazAqparat - Qaraǵandy oblysynda avtomobıl joldaryn belsendi túrde qalypqa keltirý jumystary jalǵasýda, dep habarlaıdy QazAqparat ákimniń saıtyna silteme jasap.
Qaraǵandy oblysyndaǵy jol qurylysy týraly aımaq basshysy Erlan Qoshanov halyq aldyndaǵy eseptik kezdesýi barysynda aıtty.
«Qaraǵandyda jumysymdy bastaǵan bette birinshi kezekte nazar aýdarǵanym - ol joldar boldy. Birlese otyryp salǵan kúshimizdiń, salalyq mınıstrlikterdiń qoldaýynyń arqasynda biz aýqymdy jóndeý kampanııasyn ótkizdik, onda 863 shaqyrym joldy qamtydyq. Jóndeý jumystarynyń quny 33,5 mlrd teńgeni qurady», - dep esep berdi oblys ákimi.
237 shaqyrym jol oblysymyzdyń iri qalalarynda - Qaraǵandy, Jezqazǵan, Temirtaý, Balqash shaharlarynda jóndeldi. Qaraǵandy-Jezqazǵan, Qaraǵandy-Qarqaraly avtojoldary nashar jaǵdaıda boldy. Ótken jyly bul trassalardaǵy anaǵurlym problemaly bólikter jóndeldi, 2018-shi jyly jumystar aıaqtalady.
«Bıylǵy jyly jóndeý jumystarynyń kólemderi áýelgi deńgeıde saqtalyp qalady. Tolyqqandy 6 jolaqty avtoban bolatyn Qaraǵandy-Temirtaý jolyn jaılastyrýdy aıaqtaımyz. Qarabas-Jartas ýchaskesiniń kúrdeli jóndeýi aıaqtalady, jánede Aqtoǵaı-Balqash ýchaskesinde kúrdeli jóndeý jalǵasady. 2015-shi jyly kóktemgi sý tasqynynan zardap shekken 4 kópirdi qaıta qalpyna keltirý jumystary támamdalady», - dep bólisti Erlan Qoshanov.
Sonymen qatar, Qaraǵandyny aınalyp ótý jolynyń ýchaskilerinde belsendi qurylys bastalady. Quny 34 mlrd teńgeni quraıtyn jobany júzege asyrý arqyly qalanyń kólik qozǵalysyn sál bosatýǵa bolady. Soltústik jáne Shyǵys aınalma joldar paıda bolady. 
«Qaraǵandy arqyly táýligine 22 myń tranzıtti kólikter júrip ótedi - bul aýany lastaıdy, keptelis qalyptastyrady, jol qozǵalysy qaýipsizdigine áser etedi, - dep atap ótti oblys ákimi.
Sonymen qatar Pavlodar oblysynyń shekarasyna deıin baratyn Qaraǵandy-Baıanaýyl jolynyń eń problemalyq ýchaskilerin jóndeý josparda tur. Jáırem-Qarajal jáne Qarajal-Atasý jolyn jóndeýdi bastap, 2019-shy jyly aıaqtaý kózdelip otyr.
«Birneshe jylda alǵash ret aýyldyq jerlerdiń joldaryna erekshe nazar aýdarylady. Bul baǵyttarǵa 3,4 mlrd teńge baǵyttalady. Osynyń esebinen 220 shaqyrym aýyldyq joldar qamtylatyn bolady. Sonan soń bul máseleni oblymysyzdyń aýyldyq aımaqtarynda sheshetin bolamyz», - dep qosty aımaq basshysy.
