Qaraǵandyny aınalyp ótetin jańa joldyń qurylysy bıyl aıaqtalady
QARAǴANDY. QazAqparat - Qaraǵandy mańyndaǵy soltústik-shyǵys aınalma joldyń qurylysy aıaqtalýǵa jaqyn qaldy. Bul týraly oblys ákimi Erlan Qoshanovtyń joldy jóndeý jumystaryn tekserý barysynda qurylysshylar aıtty, dep habarlaıdy QazAqparat tilshisi.
Soltústik-Shyǵys aınalma jolynyń jalpy uzyndyǵy 48,4 shaqyrymdy quraıdy. Jańa joldyń ashylýymen qalany tranzıttik avtomobılder men úlken júk kólikterinen bosatýǵa múmkindik paıda bolady.
«Bul jol - strategııalyq mańyzdy nysan. Qalanyń 85 jyldyq tarıhynda aınalma jol paıda bolady. Jańa jol kóliktik júktemege de, ekologııaǵa da oń áser etedi, bul óte mańyzdy», - dep atap ótti Erlan Qoshanov.
Merdigerler - «SıneMıdasStroı» túrik kompanııasy jáne «Rıazanov A. atyndaǵy Kópir qurylys otrıady JShS» Almaty fırmasy. Qazir trassada belsendi qurylys jumystary júrip jatyr. Qurylysshylardyń aldynda osy jyldyń sońyna deıin jańa tasjoldy tolyq ashý mindeti tur.
«Qazir biz joldyń boıynda jabynnyń joǵarǵy qabatyn jasaýdamyz. Sondaı-aq áýejaıǵa aparatyn jol qıylysynda estakada salynady. Barlyq jumystar keste boıynsha júrip jatyr. Jol aıryǵy 60-70%-ǵa oryndaldy, tek jol tósemin ornatý jumystary ǵana qaldy», - dedi «Qazavtojol» AQ Qaraǵandy oblystyq fılıalynyń dırektory Serik Aıdos.
Trassada Qaraǵandydan Almatyǵa, Nur-Sultan, Pavlodar jáne Shyǵys Qazaqstan oblystary baǵyttary boıynsha jeti kólik aıyryǵy qarastyrylǵan. Jol tóseminiń jalpy qalyńdyǵy shamamen 80 santımetr. Tómengi qabattar bıtým qosylǵan betonnan jáne qıyrshyqtastan turady. Joǵarǵy qabaty - bıiktigi bes santımetr iri túıirshikti jáne qıyrshyq-mastıkalyq asfalttan jasalǵan.
Mundaı jol tósemine merdigerler úsh jyl kepildik beredi.
Jalpy, búgingi kúni óńirde joldardyń 80% jaqsy jáne qanaǵattanarlyq jaǵdaıda. 2020 jylǵa qaraı 90% joldar qajetti sapaǵa sáıkes keltiriledi. Oblys boıynsha aýqymdy jol-jóndeý jumystary júrip jatyr. Tek osy jyly myńdaǵan shaqyrymdy retke keltirý josparda bar. Jóndeý jumystary tek qalalardaǵy ortalyq kóshelerde ǵana ótkizilip qoımaı, sonymen qatar ótken jyldan bastap aýdan ortalyqtary men kentterdiń ishindegi joldardy jóndeý jumystary da bastaldy.
