Qaraǵandylyqtarǵa zańsyz júretin avtobýstardyń qaýipti ekeni eskertildi
QARAǴANDY. QazAqparat - Qaraǵandy oblysynda zańsyz jolaýshylar tasymaly jıilep ketti, dep habarlaıdy QazAqparat tilshisi.
«Zańsyz marshrýttardyń, avtobýstar men taksılerdiń qyzmetterin paıdalanatyn azamattar densaýlyqtary men ómirlerine qaýip tóndiredi. Sebebi zańsyz júrgizýshiler paıda tabý maqsatynda jol qozǵalysy erejelerin buzyp, jyldamdyq rejimin saqtamaıdy. Saldarynan jolaýshylar jaraqattar alyp, tipti ólimge ákeletin jol apattary bolyp jatady. Statıstıka boıynsha zańsyz tasymaldaýshylar zańdy júrgizýshilerden góri jol erejelerin eki ese kóp buzyp, jol apatyna ushyraıtyn bolyp shyqty», - dedi oblystyń ІІD-degiler.
Ústimizdegi jyldyń qańtar men tamyz aılary aralyǵynda qoǵamdyq kólik júrgizýshileri tarapynan ákimshilik zańnamany buzýǵa qatysty 1421 derek tirkeldi. Ondaǵy 22 ákimshilik hattama jolaýshylar men júkti zańsyz tasymaldaǵan júrgizýshilerge qatysty toltyryldy.
Qaraǵandy oblysynda qoǵamdyq kólik júrgizýshileriniń kinásinen 12 jol-kólik oqıǵasy tirkelgen. Apat saldarynan 17 adam jaraqat alǵan, qaza tapqandar joq. Ótken jylmen salystyrǵanda jaraqat alǵan jolaýshylar sany 30% ósken.
